“Mme Unan eke Ufan Ọnọde”

APOSTLE Paul ama okụt ke oyom inọ mme Christian akpa isua ikie ke Galatia ndusụk edinen̄ede. Eyedi man ọbiọn̄ọ iyatesịt ekededi, enye ama obụp ete: “Nte mmakabade ndi asua mbufo koro nsiande mbufo akpanikọ?”—Galatia 4:16.

Ke ‘ndisian mmọ akpanikọ,’ Paul ikakabakede idi asua mmọ. Ke akpanikọ, enye akanam n̄kpọ ke n̄kemuyo ye edumbet Bible emi: “Mme unan eke ufan ọnọde ẹdi akpanikọ.” (Mme N̄ke 27:6) Enye ama ọfiọk ete ke imekeme ndinọ uku mbon oro ẹduede unan. Edi, enye ama ọfiọk ete ke imọ nditre ndinọ anamidiọk ntụnọ oro enye oyomde ekeme ndiwọrọ ndinam owo oro ataba ima Jehovah Abasi. (Mme Hebrew 12:5-7) Ke ntre, nte ufan emi anamde akpanikọ onyụn̄ ekerede aban̄a nsinsi ufọn esop oro, Paul iketreke ndinọ item edinen̄ede.

Mfịn, Mme Ntiense Jehovah ke ẹnam utom emi ẹkedọn̄de mmọ ẹte ‘ẹnam kpukpru mme idụt ẹdi mbet, ẹkpep mmọ ẹnam kpukpru n̄kpọ eke [Jesus Christ] eketemede.’ Ke ndinam ntre, mme ata Christian emi isiakke mmọn̄ ke akpanikọ Bible oro ayararede onyụn̄ obiomde ukwan̄ ukpepn̄kpọ ye edu uwem oro mîdịghe eke Christian ikpe. (Matthew 15:9; 23:9; 28:19, 20; 1 Corinth 6:9, 10) Utu ke ndikabade ndi mme usua emi ẹkpesịnde-sịn, mmọ ẹwụt edikere mban̄a emi mme ata ufan ẹsiwụtde.

Ye ikike oro Abasi ọnọde, andiwet psalm ekewet ete: “Yak owo eti ido amia mi ke ima, onyụn̄ asua ọnọ mi: aran ibuot ke ibuot mi idisịnke.”—Psalm 141:5.