Ndisọn̄ọ Nda Nnam Akpanikọ nnọ Jehovah

OKPOSỤKEDI edinam akpanikọ ananade mfịn, enye edi edu emi ẹdade ẹdiọn̄ọ mme asan̄autom ata Abasi, Jehovah. Owo emi anamde akpanikọ esisọn̄ọ ada ke idomo isinyụn̄ isehekede kpa ye oro anyan ini ebede. Kere ban̄a eti Edidem Hezekiah. Bible ọdọhọ ete: “Baba owo kiet inyụn̄ ibietke enye ke otu kpukpru ndidem Judah oro ẹtienede enye ke edem, ye ke otu mmọ oro ẹkebemde enye iso.” Nso ikanam Hezekiah edi n̄wọrọnda? Enye ama “eyịre ye Jehovah,” idem okposụkedi mme andituak ibuot nnọ nsunsu abasi Molech ẹkekande enye ẹkụk. Ih, Hezekiah ‘iketreke nditiene Jehovah, edi enịm mbet esie.’—2 Ndidem 18:1-6.

Apostle Paul ekedi owo efen emi ọkọsọn̄ọde ada anam akpanikọ ọnọ Jehovah. Mbụk utom ukwọrọikọ esie oro ẹwetde ke N̄wed Abasi Christian Usem Greek ọnọ in̄wan̄în̄wan̄ uyarade nte ke Paul ama enyene iwụk ke ndinam utom ofụri ukpọn̄ nnọ Abasi. Ke ekperede utịt uwem esie eke isọn̄, Paul ama ekeme nditịn̄ mban̄a idemesie ete: “Mma n̄n̄wana eti en̄wan, mma mfehe mbuba mi mma, mma nsọn̄ọ mmụm mbuọtidem mi n̄kama.”—2 Timothy 4:7.

Nso nti uwụtn̄kpọ edinam akpanikọ ke Paul ye Hezekiah ẹdi ntem! Nnyịn ikpakam ikpebe mbuọtidem mmọ ebe ke ndisọn̄ọ nda nnam akpanikọ nnọ Akwa Abasi nnyịn, Jehovah.—Mme Hebrew 13:7.