“Nyakanade Itie-Uwa Fo N̄kụk, O Jehovah”
“NYEYET ubọk mi ẹsana: ndien nyakanade itie-uwa fo n̄kụk, O Jehovah.” (Psalm 26:6) Edidem David eke eset akatan̄a mme ikọ ẹmi nte enye esịnde idem ke utuakibuot Jehovah. Nte ededi, ntak emi enye ‘akakanade’ itieuwa Jehovah, ndien ke nso usụn̄ifiọk?
Ye David, ataya oro ekenyenede itieuwa emi ẹkedade okpoho ẹfụk, oro okodude ke Gibeon ke ini ukara esie, ke edem edere Jerusalem, ekedi iwụk ebiet utuakibuot Jehovah. (1 Ndidem 3:4) Itieuwa oro ekedi n̄kpọ nte mita iba ke n̄kan̄ mbinan̄, enen̄erede ekpri akan akwa itieuwa oro ẹkebọpde ke okụre temple Solomon.a Kpa ye oro, David ama okop akwa idatesịt aban̄a ataya oro ye itieuwa esie, emi ekedide iwụk ebiet edisana utuakibuot ke Israel.—Psalm 26:8.
Ẹkesiwa edifọp uwa, uwa emem, ye uwa idiọkido ke itieuwa oro, ndien ẹma ẹsiwa mme uwa ke ufọn idụt oro ke Usen Usio-Isop eke isua ke isua. Itieuwa oro ye mme uwa ẹmi ẹkesiwade do ẹnyene se ẹwọrọde ẹnọ mme Christian mfịn. Apostle Paul ama anam an̄wan̄a ete ke itieuwa oro akada aban̄a uduak Abasi, emi Enye ekenyịmede ndida mbọ uwa eke odotde kaban̄a edifak ubonowo. Paul ọkọdọhọ ete: “Ẹma ẹda uduak emi ẹnam nnyịn isana ke ediwa emi Jesus akawade ikpọkidem Esie ini kiet.”—Mme Hebrew 10:5-10.
Ke ini ẹkeyomde ndinam utom ke itieuwa, mme oku nte ido edide ẹma ẹsida mmọn̄ ẹyet ubọk mmọ man mmọ ẹsana. Nte odotde ndien, Edidem David ama eyet ubọk esie “ẹsana” mbemiso ‘akanade itieuwa.’ Enye akanam n̄kpọ “ke ofụri esịt nte enende.” (1 Ndidem 9:4) Edieke enye mîkeyetke ubọk esie ke usụn̄ emi, owo ikpekenyịmeke utuakibuot esie—enye ‘ndikanade itieuwa.’ Nte ededi, David ikotoho ubon Levi ndien ikenyeneke ifet ndinam utom oku ke itieuwa. Okposụkedi enye ekedide edidem, owo ikakam inyịmeke enye odụk okụre ataya. Edi, nte eyen Israel oro anamde akpanikọ, enye ama enịm Ibet Moses esinyụn̄ ada enọ esie ediwa ke itieuwa. Enye ama akanade itieuwa ke usụn̄ifiọk eke edinam edisana utuakibuot edi ata akpan n̄kpọ ke uwem esie.
Ndi nnyịn mfịn imekeme nditiene uwụtn̄kpọ David? Ih. Nnyịn n̄ko imekeme ndiyet ubọk nnyịn ẹsana inyụn̄ ikanade itieuwa Abasi edieke nnyịn iwụtde mbuọtidem ke uwa Jesus ndien, ida ‘ubọk eke asanade ye esịt emi mîdeheke,’ inam utom Jehovah ke ofụri esịt.—Psalm 24:4.
[Mme Ikọ idakisọn̄]
a Itieuwa oro ekedi n̄kpọ nte mita usụkkiet ke n̄kan̄ mbinan̄.
[Ndise ke page 23]
Itieuwa oro akada aban̄a uduak Jehovah, emi enye ekenyịmede ndida mbọ uwa eke odotde kaban̄a edifak ubonowo