Ntọt Mme Anditan̄a Obio Ubọn̄
Inem Inem Uwem Ubon Anam Mbon Efen Ẹsan̄a Ẹkpere Abasi
JEHOVAH ama ọnọ Joseph akwa ọniọn̄ ye mbufiọk. (Utom 7:10) Nte utịp, ikike Joseph ama “enem Pharaoh, onyụn̄ enem kpukpru ikọt esie.”—Genesis 41:37.
Ukem ntre mfịn, Jehovah ọnọ ikọt esie ikike ye mbufiọk ebe ke ukpepn̄kpọ Bible mmọ. (2 Timothy 3:16, 17) Ọniọn̄ ye mbufiọk ẹmi ẹsion̄o nti mbun̄wụm ẹdi nte ẹdade item oro ọkọn̄ọde ke Bible ẹsịn ke edinam. Eti edu uwem mmọ esiwak ‘ndinem mbon ẹmi ẹkụtde,’ nte mme ifiọkutom ẹtienede mi, ẹmi ẹtode Zimbabwe ẹnamde an̄wan̄a.
• N̄wan kiet ama enyene mme mbọhọidụn̄ ẹmi ẹkedide Mme Ntiense Jehovah. Okposụkedi enye mîkamaha Mme Ntiense oro, enye ama ama edu uwem mmọ, akpan akpan uwem ufọk mmọ. Enye ama okụt nte ke ebe ye n̄wan oro ẹma ẹnyene ata eti itie ebuana ye nte ke nditọ mmọ ẹma ẹkop item. Enye ama enen̄ede okụt ke ebe oro ama enen̄ede ama n̄wan esie.
Se ẹwakde ndinịm ke akpanikọ ke ndusụk itie ke Africa edi nte ke edieke ebe amade n̄wan esie, anaedi n̄wan ọnọ enye “ibọk ima.” Ntre n̄wan emi ama aka ebịne n̄wan Ntiense oro ekeben̄e enye ete: “Mbọk nte afo ọyọnọ mi ibọk ima oro ọkọnọde uberi man ebe mi ama mi nte uberi amade fi?” Ntiense oro ama ọbọrọ ete: “Oh, ih, nyada enye nsọk fi uwemeyo n̄kpọn̄.”
Ke ndan̄nsiere, eyenete an̄wan oro ama ada “ibọk ima” esie ọsọk mbọhọidụn̄ esie. Nso ke enye ekedi? Ekedi Bible ye n̄wed Ifiọk Oro Adade Osịm Nsinsi Uwem. Ke ama ekeneme ntọt odude ke n̄wed Ifiọk ke ibuotikọ oro “Ndibọp Ubon Oro Okponode Abasi,” enye ama ọdọhọ n̄wan oro ete: “Emi edi ‘ibọk ima’ oro ami ye ebe mi inọde kiet eken, ndien ntak edi oro nnyịn inen̄erede ima kiet eken.” Ẹma ẹtọn̄ọ ukpepn̄kpọ Bible, ndien n̄wan oro ama ọsọsọp anam n̄kọri ekesịm idaha ediyarade uyakidem esie nnọ Jehovah ebe ke ndibụhọ ke mmọn̄.
• Akpan asiakusụn̄ iba ẹmi ẹkenọde ẹkenam utom ke ekpri esop kiet emi ekperede n̄kan̄ ufọt edem edere ye edem usiahautịn Zimbabwe ye Mozambique ikọwọrọke an̄wautom eke enyịnusụn̄ ke enyịnusụn̄ ke urua iba. Ntak-a? Koro mme owo ẹkekade ẹbịne mmọ ẹkekpan̄ utọn̄ ẹkop se mmọ ẹkenyenede nditịn̄. Kiet ke otu mme asiakusụn̄ ẹmi obụk nte emi eketịbede: “Nnyịn ikanam isan̄ emi edide kilomita 15 ika ndikenịm ukpepn̄kpọ Bible eke urua ke urua ye owo emi enyenede udọn̄. Ikedịghe mmemmem n̄kpọ nnyịn ndisịm ebiet emi. Nnyịn ikenyene ndisan̄a ke mbat, ikonyụn̄ inyene ndiwọk mbe akpa emi ofụkde nnyịn esịm itọn̄. Emi ama abuana ndibiom ọfọn̄ ye ikpaukot nnyịn ke ibuot, ndiwọk mbe akpa, ndien ekem itọn̄ọ ntak isịne ọfọn̄ ke edem akpa eken.
“Mme mbọhọidụn̄ owo emi enyenede udọn̄ mi ẹma ẹnen̄ede ẹma ifịk nnyịn. Kiet ke otu mbon oro ẹkekụtde emi ekedi adausụn̄ ke esop ido ukpono n̄kann̄kụk oro. Enye ama ọdọhọ mme anditiene enye ete: ‘Nte mbufo iyomke ndinyene ifịk nte n̄kparawa iba oro ẹdide Mme Ntiense Jehovah?’ Ke ndan̄nsiere, ediwak ke otu mme anditiene enye ẹma ẹdi ufọk nnyịn ẹdibụp ntak emi nnyịn inyenede ifịk ntre. Adianade do, ke urua iba ẹmi ẹketienede, nnyịn ima inyene ata ediwak isenowo tutu nnyịn ikakam inyeneke ini nditem udia ndia!”
Kiet ke otu mbon oro ẹkekade ufọk mme asiakusụn̄ ẹmi ke ikpehe ini urua iba emi ekedi adausụn̄ ido ukpono oro. Kere nte mme asiakusụn̄ oro ẹkekopde idatesịt ke ini enye ekenyịmede ukpepn̄kpọ Bible!