Enọ Oro Ọsọn̄de Urua ke Enyịn Jehovah

Ẹkebọ leta etienede mi ke ọfis n̄kọk itieutom Mme Ntiense Jehovah ke Mozambique:

“Ami ndi eyeneren isua itiaba. Ami nsụk ndu ke ufọkn̄wed praimari. Ami nnọ okụk emi n̄kenyenede nto edibọk unen ẹdi. N̄kanyam enye Meticais 12,000 [$1, U.S.]. Mmọkọm Jehovah ke ndinam akpa unen oro akanam mbọkde edi ekikọ. Ami n̄kpama ẹda enọ mi ẹnam utom Obio Ubọn̄ Jehovah.

“Se ẹwetde ẹdian: Ete mi akan̄wam mi ewet leta emi.”

Ndusụk owo ẹkere ke mbon oro ẹnyenede ekese n̄kpọ obụkidem ẹsiwụt ntatubọk. Nte ededi, ke ini nnyịn ikotde mbụk Bible aban̄ade ebeakpa oro ekesịnde “n̄kpri okudọk iba” ke usịn etịbe, nnyịn imekeme ndikụt nte ke owo idaha udomo n̄kpọ emi owo ọnọde ifiọk ntatubọk, edi ẹda eti idaha esịt.—Luke 21:1-4.

Jehovah adadara kpukpru enọ ẹmi ẹtode esịt oro ima onụkde, inamke n̄kpọ m̀mê ẹkpri adan̄a didie. Ndien enye esinen̄ede ọdiọn̄ mbon oro ẹkpebede ntatubọk esie ebe ke ndinọ ini, odudu, m̀mê inyene obụkidem mmọ kaban̄a utom Obio Ubọn̄ esie.—Matthew 6:33; Mme Hebrew 6:10.