Ẹnam N̄wed Daniel An̄wan̄a!

MME andidụk mbono ẹma ẹnyene ọkpọsọn̄ udọn̄ ndibọ obufa n̄wed oro ẹkesiode, Nọ Ntịn̄enyịn ke Prọfesi Daniel! emi enyenede page 320. Didie ke n̄wed oro okotụk mmọ? Kere ban̄a se ndusụk mmọ ẹketịn̄de.

“Ukem nte ata ediwak uyen, esisọn̄ mi ndikop inem ukpepn̄kpọ mbụkeset. Ntre ke ini n̄kọbọde obufa n̄wed oro, Nọ Ntịn̄enyịn ke Prọfesi Daniel!, n̄kenen̄ekede n̄kop nduaidem ndikot enye, edi mma ndomo nse. Ke akpanikọ, n̄kenyene ukwan̄ edu! Emi edi kiet ke otu mfọnn̄kan n̄wed oro akanam n̄kotde. Enye enen̄ede omụm owo udọn̄! Iketiehe mi ke idem aba nte ke n̄kot mbụk emi eketịbede ke ediwak tọsịn isua ẹmi ẹkebede. Ke akpa ini, mma n̄kere ke mmekeme ndifiọk se Daniel okosobode. Mmekeme nditịm n̄kụt ke enyịn ikike nte etiede ndimen fi n̄kpọn̄ ubon fo, nnọ fi aka esenidụt, nnyụn̄ ndomo nsọn̄ọnda fo kpukpru ini. Ẹsọsọn̄ọ ata etieti ke n̄wed emi.”—Anya.

“Se in̄wamde mi akpan akpan edi in̄wan̄în̄wan̄ etop oro nte ke Jehovah ke ese aban̄a mme n̄kpọ ẹtụkde ikọt esie ọyọhọ ọyọhọ. Ebede ke mme n̄kukụt ye mme ndap Daniel ye eke mbon efen ẹmi enye akasiakde, ana in̄wan̄în̄wan̄ nte ke tutu amama Abasi nnyịn idiyakke mme n̄kpọ ẹkpụhọde ẹkpọn̄ se enye akaduakde. Emi ọsọn̄ọ idotenyịn nnyịn ke mme ntịn̄nnịm ikọ ẹdude ke Bible aban̄ade obufa ererimbot emi enye edinamde.”—Chester.

“Mma mma usụn̄ nte mbufo ẹkenamde etie nte ke Daniel mmọdo ke uwem. Mma ntịm mmehe ye enye ebe ke usụn̄ nte mbufo ẹkewụtde mme mfịna ye mme editịmede esịt esie. Mma n̄keme nditịm mfiọk ntak emi Jehovah akamade enye ntre. Ke ofụri idomo ye mme ukọbọ esie, enye ikekereke iban̄a idemesie. Se ikebehede enye akpan akpan ekedi Jehovah ye edisana enyịn̄ Esie. Ẹsọsọn̄ọ ke ndinam mme akpan n̄kpọ ẹmi ẹwọrọ ẹda.”—Joy.

“Se nnyịn iketiede ibet edi emi! Akananam owo iwụtke adan̄a nte n̄wed Daniel enen̄ede otụk nnyịn owo kiet kiet ntem. Ke mma n̄kokot obufa n̄wed oro n̄ka anyan ke mbubịteyo oro n̄kọbọde enye, n̄kenyene ndituak nda n̄kọm Jehovah ke akam.”—Mark.

“Se nnyịn mîkodorike enyịn ekedi odudu oro enye enyenede ke idem nditọ nnyịn. Kiet edi isua ition eken edi isua ita ke emana. . . . Ke adan̄aemi mbụk Daniel, Hananiah, Mishael, ye Azariah ẹdude ke otu mbụk ẹmi mmọ ẹmade ẹkan kpukpru ini ke N̄wed Mi eke Mme Mbụk Bible, nte ẹbụkde enye ke n̄wed Prọfesi Daniel omotụk mmọ ke usụn̄ oro nnyịn mîkekereke. Kpa ye ẹkpride ke emana, etie nte mmọ ẹma ndinam n̄kpọ nte ndinen n̄kparawa ẹmi. Nso utịbe utịbe uwụtn̄kpọ ke mmọ ẹdi ntem ẹnọ nditọ nnyịn ndikpebe! Nso utịbe utịbe n̄kpọutom ke mbufo ẹnọ nnyịn ntem! Ẹsọsọn̄ọ, ẹsọsọn̄ọ ata etieti!”—Bethel.

“Eketie mi nte ke n̄kodu do ye n̄kparawa Hebrew ita oro nte mmọ ẹsobode idomo mbuọtidem mmọ; ndien oro ama esịn udọn̄ ọnọ mi ndidụn̄ọde mbuọtidem mi. Ekebe ndụn̄ọde oro ẹkotde ‘Nso ke Afo Okokụt?’ anam se isịnede ke ibuot kiet kiet odụk owo esịt. Ẹsọsọn̄ọ ke ndinọ n̄wọrọnda n̄kpọ efen.”—Lydia.