N̄wọrọnda Isua ke Edisuan Bible

MME owo ẹwakde ẹkan nte akanam edide ẹnyene Bible. Oro edi se ntọt emi otode Mme N̄ka Bible Ẹdianade Kiet ọnọde ekikere aban̄a, koro ibat Bible emi ẹkesuande ke 1998 ama ada se ibede tọsịn ikie ition awak akan isua emi ekebemde iso. Ke ofụri ofụri, ẹma ẹsuan se iwakde ibe Bible 585,000,000—ke ofụri ofụri m̀mê ke ubak ubak—ke ofụri ererimbot. Ntọt oro ọdọhọ ete: “Emi edi n̄kpọ nsịnudọn̄. Ke ẹda Ikọ Abasi ẹsịm mme owo efen efen mfịn.”

Nte ededi, ukpụhọde odu ke ufọt edinyene Bible ye edikot enye. Ke uwụtn̄kpọ, ndụn̄ọde kiet ama owụt ete ke se iwakde ibe mbahade 90 eke ikie ke otu mbon America ẹnyene ke nsụhọde n̄kaha Bible kiet, ndien ukem ibat oro ẹnịm ẹte ke Bible edi eti ebiet emi ukpepn̄kpọ ido uwem otode. Nte ededi, mbahade 59 eke ikie kpọt ẹkedọhọ ke mmimọ imesika ibịne Bible ikoyom item. Ndien mbahade 29 eke ikie ẹma ẹnyịme ẹte ke mmimọ “itịmke imehe” mîdịghe “imeheke-mehe” ye Bible.

Ikụreke ke Mme Ntiense Jehovah ndimịn̄ nnyụn̄ nsuan mme Bible edi mmọ n̄ko ẹnịm mme ukpepn̄kpọ Bible mfọn ye mme owo ke se iwakde ibe idụt 230. Ediwak miliọn owo ke ofụri ererimbot ke ẹbọ ufọn idahaemi ẹto ndutịm unọ ukpep Bible emi. Ẹn̄wam mmọ ndiyọ mme mfịna oro mmọ ẹsobode idahaemi, ndien mmọ ẹkpep se Bible etịn̄de aban̄a nyayama ini iso ke idak Obio Ubọn̄ Abasi.—Isaiah 48:17, 18; Matthew 6:9, 10.

[Mme ndise ke page 32]

Ukpepn̄kpọ Bible ke (ẹto enyọn̄ ufien ẹka nnasia) Bolivia, Ghana, Sri Lanka, ye England