Ke Ini ‘Ofụm Ọbiọn̄ọde Nnyịn’

Ke etịn̄de aban̄a ata ata ifiọk n̄kpọntịbe eke mme mbet Jesus nte mmọ ẹken̄wanade ndibe Inyan̄ Galilee ke ubom, Mark andiwet Gospel ọdọhọ ete ke ama ‘ọsọn̄ mmọ idem ndiwat, koro ofụm ọkọbiọn̄ọde mmọ.’ Ke adan̄aemi okosụk odude ke mbenesụk oro, Jesus ama okụt nnanenyịn mmọ onyụn̄ asan̄a ke enyọn̄ inyan̄ ke utịbe utịbe usụn̄ etiene mmọ. Ke ini ‘enye etienede mmọ ediere ke ubom, ofụm odobo.’—Mark 6:48-51.

Kpa andiwet Bible emi ọkọtọt ete ke idaha kiet ko ke edem, ‘akwa oyobio ama etịbe.’ Ndien, Jesus “asua ọnọ ofụm . . . , ndien ofụm odobo, mmọn̄ onyụn̄ ana sụn̄-n̄.”—Mark 4:37-39.

Okposụkedi nnyịn mfịn mînyeneke ifet ndikụt mme utọ utịbe utịbe edinam oro, nnyịn imekeme ndikpep ekese n̄kpọ nto mmọ. Nte mme anana-mfọnmma owo ẹmi idude uwem ke ndiọkeyo, nnyịn ibọhọke oyobio afanikọn̄. (2 Timothy 3:1-5) Ke akpanikọ, ke ndusụk idaha ekeme nditie nnyịn nte ke nnanenyịn emi asan̄ade ye mme ọkpọkpọ idomo ọsọn̄ ubọk nte oyobio. Edi un̄wam odu! Jesus ọnọ ikot ete: “Ẹtiene Mi, kpukpru mbufo ẹmi ẹkpade mba ẹnyụn̄ ẹbiomde edidobi mbiomo, ndien Ami nyọnọ mbufo nduọk-odudu.”—Matthew 11:28.

Ke ini etiede nte ‘ofụm ọbiọn̄ọ nnyịn,’ esịt nnyịn ekeme ‘ndina sụn̄-n̄.’ Didie? Ke ndibuọt idem ke mme un̄wọn̄ọ Jehovah Abasi ẹmi mîkemeke ndikpu.—Men Isaiah 55:9-11; Philippi 4:5-7 domo.