Nte Bible Ekeme Ndin̄wam Nnyịn Mfịn?
“KE OFỤRI Bible, n̄kpọ nte mbahade 1 ke itie ikie odot ẹkot, edi kpukpru oko inyeneke ufọn ẹnyụn̄ ẹdi n̄kpọeset.” Ntre ke akparawa kiet ọkọdọhọ. Ediwak owo ẹyenyịme ye enye. Okposụkedi Bible akade iso ndidi n̄wed oro anyamade akan ke ofụri ererimbot, ediwak miliọn owo ẹnọ enye ata esisịt ntịn̄enyịn inyụn̄ imeheke ye mme ukpepn̄kpọ esie.
Ke nsiondi esie eke Christmas 1996, n̄wedmbụk n̄kpọntịbe usem German oro Süddeutsche Zeitung ọkọdọhọ ete ke Bible “enyene mme andikot oro ibat akade-ka iso ndisụhọde. Ke eyo ifiọk ntaifiọk aban̄ade n̄kpọ obot ye n̄kọri ke edima mme n̄kpọ ererimbot emi, etie ndusụk owo nte ke mme mbụk Bible ẹdi esen esen ẹnyụn̄ ẹsọn̄ ndin̄wan̄a owo.” Mme ndụn̄ọde ẹsọn̄ọ ntọt emi. Ndusụk ndụn̄ọde ẹyarade nte ke ata ediwak nditọwọn̄ ikam inen̄ekede ifiọk owo emi Jesus edide. Ke ndụn̄ọde kiet, se isụhọrede ikan mbahade iba ke otu mbon oro ẹkedade ẹnam ndụn̄ọde ẹkekeme nditịn̄ mme mbụk Bible ẹban̄ade idiọk udọ ye owo Samaria emi ekenyenede edu mbọhọidụn̄.
N̄wed Ufọkabasi Evangelical eke Switzerland oro Reformiertes Forum ọdọhọ ete ke mme owo iyomke aba Bible ke Switzerland nte ẹkesiyomde. Idem ke otu mbon oro ẹnyenede Bible, enye esiwak ndidoro ke n̄kpọ udori n̄wed mbọ ntọn̄. Ukpụhọde idụhe ke Britain. Nte ndụn̄ọde kiet ọdọhọde, okposụkedi ata ediwak owo ẹnyenede Bible, ekese owo iwakke ndikot enye.
Ke n̄kan̄ eken, ediwak miliọn owo ke ofụri ererimbot ẹnyene nsio nsio ekikere ẹban̄a Bible. Mmọ ẹse enye nte Ikọ Abasi ẹnyụn̄ ẹda enye nte ọsọn̄urua n̄kpọ ye se inọde ufọn. Ntem, mmọ ẹsikot enye kpukpru ini. N̄kaiferi kiet ekewet ete: “Mmesidomo ndikot ibuotn̄wed Bible kiet m̀mê iba kpukpru usen. Enye esinem mi etieti.” Mme utọ owo oro ẹnen̄ede ẹnọ ntịn̄enyịn ke se Bible ekpepde, ẹnyụn̄ ẹdomo ndida item esie nsịn ke edinam ke uwem mmọ. Mmọ ẹnịm ke akpanikọ ẹte ke Bible ekeme ndin̄wam mmimọ ke ntịme ntịme ererimbot mfịn.
Nso idi ekikere fo? Nte Bible inyeneke ufọn ke eyomfịn? Mîdịghe nte enye edi ọsọn̄urua n̄kpọ onyụn̄ enyene ufọn? Nte Bible ekeme ndin̄wam nnyịn mfịn?