Usua Eke Orụk Ye Ido Ukpono

“KE INI n̄kedide U.S. ke 1978, n̄kenịm ke akpanikọ nte ke America ama ọkọk mme mfịna esie eke orụk ke anyan ini ko, nte ke mbubịt owo ẹkedi ukem nditọisọn̄,” ntre ke Mark Mathabane, eyenisọn̄ South Africa edide ewetn̄wed, ọkọdọhọ ke ndụn̄ọde ẹkenamde ye enye ke magazine Time. “Mma n̄kụt ke oro ekedi ntre ke ediwak usụn̄. Eketie nte ke U.S. ama enen̄ede aka anyan akan South Africa. Ekem mma n̄kụt ke enyene-ndịk usụn̄ nte ke esịt ediwak owo inen̄ekede ikpụhọde.” Nso ikanam enye edikụt akpa-owo-idem idaha oro?

Mathabane ọkọdọhọ ete: “Kiet ke otu hour oro akamade ubahade akan ke America edi n̄kanika 11 usenubọk ke Sunday.” Enye ama okụt ete idem ke ufọkabasi, mme owo imaha ndidiana kiet ye orụk en̄wen ke utuakibuot. Enye ama obụp ete: “Editie mmọ didie ke idem ke mme usen eken ke urua?” Ke esịnde udọn̄ ọnọ ukpepn̄kpọ nte n̄kpọ oro ekemede ndida ukpụhọde ndi, Mathabane ọkọdọhọ ete: “Ukpepn̄kpọ anam fi enyịme nte ke kpukpru owo ẹdi ukem.”

Mme Ntiense Jehovah ẹnyịme ẹte ke ukpepn̄kpọ edi usọbọ, edi mmọ ẹsịn udọn̄ akpan akpan ẹnọ ukpepn̄kpọ oro ọkọn̄ọde ke Ikọ Abasi. Ih, Bible an̄wam mmọ ndiwụri mme n̄kpọ ubiọn̄ọ asari eke orụk—idem ke mme idụt oro usua eke ekpụk odude ntatara ntatara. Ke urua kiet kiet ke mme Ufọkmbono Obio Ubọn̄ mmọ, mme owo ẹtode nsio nsio orụk ye idụt ẹsisop idem ọtọkiet man ẹbọ ukpep ke mme ibet ye mme edumbet Ikọ Abasi, kpa Bible. Owo isitan̄ke etịbe ke mme mbono esop ẹmi. Afo emenyene ifụre ndidụk!