N̄kpọ Emi Ọfọnde Akan N̄kpọ Mmaidem

KE AMA eketịn̄ aban̄a “mme n̄kpọ un̄wam enyọn̄ idem” oro iban ẹsidade ẹdemede uyai, apostle Peter ama ọnọ item ete: “Utu ke oro, uyai mbufo ekpenyene ndidi ata edu mbufo, kpa nsinsi uyai edide sụn̄sụn̄ edu ye ifụre ifụre ido, emi ọsọn̄de urua akan ke enyịn Abasi.”—1 Peter 3:3, 4, Today’s English Version.

Nte enemde, ke ini apostle oro ekewetde aban̄a utọ enyọn̄ enyọn̄ edibana idem oro, enye akada orụk ikọ Greek oro koʹsmos, emi edide ebiet ẹdade ikọ oro “n̄kpọ mmaidem” ẹto, ọwọrọde “ndidemede uyai akpan akpan eke uduotidem.” Ndi Peter akakpan Christian iban ndida n̄kpọ mmaidem ye mbiet n̄kpọ un̄wam oro ẹnamde owo eye nnam n̄kpọ? N̄kpọ ndomokiet idụhe ke Ikọ Abasi emi ọnọde ekikere aban̄a oro. Utu ke oro, enye ayak owo anam ọkpọkpọ ubiere ke n̄kpọ emi, ntre ẹkeme ndidori enyịn ndikụt ukpụhọde ke mme udomo oro ẹmade.

Nte ededi, edieke ẹdade n̄kpọ mmaidem ebe ubọk, m̀mê ẹnamde ke udomo oro afịnade ediwak mbon efen, nso etop ke ẹnọ? Nte idịghe etop nsọn̄ido, unana iso o-bụt, unana ukpono, n̄wụtidem, m̀mê ntan̄idem? Ke akpanikọ, enye ekeme ndinam n̄wan anana ukpono ke nte enye etiede, ndusụk anamde ẹnyene idiọk ekikere ẹban̄a ido uwem esie.—Men Ezekiel 23:36-42 domo.

Ke ọfiọkde emi, edieke n̄wan ‘emi ọdọhọde ete imenyene uten̄e Abasi,’ emekde ndida n̄kpọ mmaidem nnam n̄kpọ, enye oyodomo ndinam iso esie owụt edu oro owụtde eti ibuot, sụn̄sụn̄ ido, mfọnido, ye nsụhọdeidem. Mme utọ edu oro ẹyefori uku ye uyai esie. Ke akpanikọ, edide enye emek ndida n̄kpọ mmaidem m̀mê imekke, enye oyowụt uku ye uyai esịtidem. Emi oyowụt ke enye ọfiọk, nte mme ikọ Peter ẹkotde ke enyọn̄ emi ẹwụtde, ke odu n̄kpọ emi ọfọnde akan n̄kpọ mmaidem.—1 Timothy 2:9, 10.