Nte Afo Emeti?
Nte afo ama adara ndikot mme nsiondi Enyọn̄-Ukpeme eke ndondo emi? Ọfọn, se m̀mê afo emekeme ndibọrọ mme mbụme ẹtienede mi:
◻ Ntak emi ikọ Paul oro “mme isụn̄utom ẹmi [ẹdide] ke enyịn̄ Christ” odotde ntre ọnọ mme Christian oro ẹyetde aran? (2 Corinth 5:20)
Ke eset, ẹkesisio mme isụn̄utom ẹdọn̄ akpan akpan ke mme ini utọk ndika n̄kese m̀mê ẹkeme nditre ndin̄wana ekọn̄. (Luke 14:31, 32) Sia anamidiọk ererimbot ubonowo adian̄arede ọkpọn̄ Abasi, enye omosion̄o mme isụn̄utom oro enye eyetde aran ọdọn̄ man ẹkesian mme owo se enye oyomde kaban̄a edinam emem, ẹkpede mmọ ubọk ẹte ẹyom emem ye Abasi.—12/15, page 18.
◻ Nso idi n̄kpọ inan̄ oro ẹkenamde mbuọtidem Abraham ọsọn̄?
Akpa, enye ama owụt mbuọtidem esie ke Jehovah ebe ke ndikpan̄ utọn̄ ke ini Abasi eketịn̄de ikọ (Mme Hebrew 11:8); ọyọhọ iba, mbuọtidem esie ama enyene n̄kpet n̄kpet ebuana ye idotenyịn esie (Rome 4:18); ọyọhọ ita, Abraham ama esinyene nneme ye Jehovah ediwak ini; ndien ọyọhọ inan̄, Jehovah ama ọnọ Abraham ibetedem ke ini enye eketienede ndausụn̄ Abasi. Mme ukem n̄kpọ oro ẹkeme ndisọn̄ọ mbuọtidem nnyịn mfịn.—1/1, page 17, 18.
◻ Nso ke ikọ oro “Kûnyụn̄ uda nnyịn usịn ke idomo” ọwọrọ? (Matthew 6:13)
Nnyịn iben̄e Abasi ite okûyak nnyịn iduọ ke ini ẹdomode nnyịn ndisọn̄ ibuot ye enye. Jehovah ekeme ndida nnyịn usụn̄ man nnyịn ikûyak idem inọ Satan, kpa “andidiọk,” enye okûnyụn̄ akan nnyịn ubọk. (1 Corinth 10:13)—1/15, page 14.
◻ Nso ke ana owo anam man Abasi adahado ke mme idiọkido? Ediyarade ndudue nnọ Abasi enyene ndisan̄a ye edikabade esịt ye “mfri eke odotde edikabade esịt.” (Luke 3:8) Edu edikabade esịt ye udọn̄ edinen̄ede se ikwan̄ade n̄ko oyonụk owo ndiyom un̄wam eke spirit nto mbiowo Christian. (James 5:13-15)—1/15, page 19.
◻ Ntak emi nnyịn ikpodomode ndisụhọde idem?
Owo nsụhọdeidem enyene ime ye anyan ime, enye inyụn̄ ibatke idem ke n̄kpọ ikaha. Nsụhọdeidem ododụri mme ufan akpanikọ ẹmi ẹmade fi ẹdi. Akande oro, enye ada edidiọn̄ Jehovah edi. (Mme N̄ke 22:4)—2/1, page 7.
◻ Nso akpan ukpụhọde idu ke ufọt n̄kpa Jesus ye eke Adam?
N̄kpa Adam ama odot, koro enye okokokoi ọsọn̄ ibuot ye Andibot enye. (Genesis 2:16, 17) Ke edide isio, n̄kpa Jesus ikodotke ke baba usụn̄ kiet, koro “Enye ikanamke idiọk-n̄kpọ.” (1 Peter 2:22) Ntre ke ini Jesus akakpade, enye ama enyene n̄kpọ oro ekenen̄erede ọsọn̄ urua oro anamidiọk Adam mîkenyeneke ke ini akakpade—unen edinyene mfọnmma uwem eke owo. Ntem, n̄kpa Jesus ama enyene ekọmurua uwa ke ndifak ubonowo.—2/15, page 15, 16.
◻ Ke ntịn̄nnịm n̄kukụt Ezekiel, nso ke obio oro akada aban̄a?
Sia obio oro odude ke ufọt isọn̄ oro edide n̄kpọ kpukpru owo (oro mîkedịghe edisana), ana enye edi n̄kpọ isọn̄. Ke ntre, etie nte enye ada aban̄a ndutịm eke isọn̄ oro edinyenede ufọn ọnọ kpukpru mbon oro ẹdinamde edinen n̄kaowo eke isọn̄.—3/1, page 18.
◻ Ntak emi Jesus ekeyetde mbet esie ukot ke ini ẹkenịmde usọrọ Passover ke 33 E.N.?
Jesus ikọtọn̄ọke ido edinam ediyet mme owo ukot. Utu ke oro, enye akan̄wam mme apostle esie ndinyene obufa ekikere—eke nsụhọdeidem ye edinyịme ndinam nsụhọde-n̄kan utom ke ufọn nditọete mmọ.—3/1, page 30.
◻ Ke nnyịn ndinọ mbon efen ukpep, nso idi akpan n̄kpọ ikan mme ndammana ukeme?
Edi mme edu oro nnyịn inyenede ye mme ido eke spirit oro nnyịn ikọride ẹmi nditọ ukpepn̄kpọ nnyịn ẹkemede ndikpebe. (Luke 6:40; 2 Peter 3:11)—3/15, page 11, 12.
◻ Didie ke mme andinọ utịn̄ikọ an̄wa ẹkeme ndifori nte mmọ ẹkotde N̄wed Abasi?
Ke ndisịn idem n̄kpep. Ih, ebe ke ndikot uyo ọwọrọ ediwak ini tutu mmọ ẹkeme ndinam ntre udọn udọn. Edieke Bible odude ke ọkpọ umụmikọ, owụt ọniọn̄ ndikpan̄ utọn̄ nnọ edisọn̄ọ ntịn̄ ikike ikọ ye edimenede ye edisụhọde uyo andikot nnyụn̄ n̄kop nte ẹkotde mme enyịn̄ ye mme esen esen ikọ.—3/15, page 20.
◻ Didie ke ‘spirit afiak etiene Abasi’ ke ini owo akpade? (Ecclesiastes 12:7)
Sia spirit edide odudu-uwem, enye ‘afiak etiene Abasi’ ke usụn̄ifiọk nte ke idotenyịn uwem ini iso ekededi emi owo oro enyenede ọkọn̄ọ ofụri ofụri idahaemi ke Abasi. Abasi ikpọn̄îkpọn̄ ekeme ndifiak nsịn spirit, m̀mê odudu-uwem, anamde owo oro afiak edidu uwem. (Psalm 104:30)—4/1, page 17.