Emem Ererimbot Oto Itie Ewe?

TE ndinam ubọ ukpep ye ido ukpono ẹdi eke ofụri ererimbot ayada emem ererimbot edi? Emi edi ekikere Dr. Robert Muller, akani udiana akwa ewetn̄wed eke Edidiana Mme Idụt ye andibọ Enọ UNESCO kaban̄a Ukpepn̄kpọ Emem eke 1989. Nte ẹketọtde ke n̄wedmbụk n̄kpọntịbe The Vancouver Sun, Dr. Muller “enịm ete ke ana ẹkpep kpukpru nditọ ufọkn̄wed ukpepn̄kpọ kaban̄a akpanikọ ye mme edumbet ẹban̄ade ekondo, ubonowo ye editre afai.” Enye odori enyịn ke usen emi kpukpru itie ukpepn̄kpọ ke ofụri ererimbot ẹdikpepde nditọwọn̄ iban̄a UN nte mfọnn̄kan idotenyịn kaban̄a emem. Enye n̄ko enịm ke akpanikọ ete ke “kpukpru ido ukpono ererimbot ẹkpenyene ndikabade ndi mme andibuana ke obufa esop mbiet UN ẹkotde Edidiana Mme Ido Ukpono,” ntre ke Sun ọkọtọt. Adan̄aoro “kpukpru ukpepn̄kpọ ido ukpono ẹyesịn udọn̄ ẹnọ editre afai.”

Ndi emem ererimbot oyodu tutu amama? Ke ofụri akpanikọ oyodu! Edi iditoho n̄kpọutom owo ekededi. Ke se iwakde ikan isua 2,700 ẹmi ẹkebede, ewetn̄wed oro ẹkenọde odudu spirit ama anam ẹfiọk akakan itie emi ukpepn̄kpọ emem otode ke ini enye ekebemde iso etịn̄ ete ke ‘Jehovah eyeteme’ mbon oro ẹnyenede eti esịt, ndien emem mmọ ‘oyokpon.’—Isaiah 54:13.

Bible ọdọhọ ete ke Abasi edi enye emi ọnọde “emem.” (Rome 16:20) Idem idahaemi utịbe utịbe ndutịm unọ ukpep ke aka iso nte Jehovah etemede ikọt esie ‘ndiyom emem nnyụn̄ mbịne enye,’ ‘ndida ofụt mmọ ndom n̄kpọ ufụn̄ isọn̄,’ ndinyụn̄ ntre ‘ndikpep ekọn̄.’—1 Peter 3:11; Isaiah 2:2-4.

Abasi enyịme onyụn̄ ọdiọn̄ ido ukpono emi ọkọn̄ọde ke akpanikọ, oro mîsan̄ake ke mbubịk ye abian̄a. (Matthew 15:7-9; John 4:23, 24) Ido ukpono akpanikọ kpọt, emi odude ke ọyọhọ n̄kemuyo ye Ikọ Abasi, ekeme ndision̄o mme owo ẹmi ẹdụn̄de ke emem ye edidianakiet ẹmi ẹnyụn̄ ẹnyenede ata ima ẹnọ kiet eken ndi.—John 13:35.

Man ekpep ekese aban̄a se Ikọ Abasi etịn̄de aban̄a emem ererimbot, nnyịn imeben̄e fi ndisobo ye mme andisio n̄wed emi.