“Mbufo Ẹtie nte Abasi Oyomde Nnyịn Itie”

E NDIDIANA kiet ye mme ukara ererimbot “kaban̄a Ọbọn̄,” mme Christian ẹkeme ndidori enyịn ndibọ “itoro” nte “mme anam nti n̄kpọ.” (1 Peter 2:13-15) Mme Ntiense Jehovah ke South Africa ẹma ẹkụt emi ke esisịt ini emi ekebede ke mbono district oro mmọ ẹkenịmde ke ufọkmbono akamba ufọkn̄wed.

Ke akpa usen mbono oro, mme bodisi ukpeme akamba ufọkn̄wed oro ẹma ẹben̄e idem nte ẹsinamde kaban̄a ukem ibat mme andidụk mbono oro ẹmi ẹsiyatde esịt mîsinyụn̄ idianake kiet, utọ nte oro mmọ ẹsikụtde ke mme orụk mbono oro. Nte ededi, sia akanam mmọ mîsoboke ye Mme Ntiense Jehovah, inem inem n̄kpọ n̄kpaidem ke akana ebet mmọ!

Nte ubak ndụn̄ọde ukpeme mmọ eke ofụri ini ke mme inuaotop, mme bodisi ukpeme oro ẹma ẹdụn̄ọde kpukpru ubomisọn̄ oro ẹkedụkde ẹnyụn̄ ẹwọrọde ke okụre oro. Idem ama akpa mmọ ke ini ẹkekọmde mmọ ke ido ufan, ime, ye ukpono, idem okposụkedi mme ndụn̄ọde oro ẹkebiatde ini mme andidụk mbono oro. Owo ikanamke ndomokiet ke otu ubiọn̄ọ, mfan̄a, m̀mê idiọk ikọ inua oro esiwakde ndida itie. “Ke mîbietke isenowo eken,” ntem ke akwa owo ukpeme kiet ọkọdọhọ, “mbufo ẹmewụt edu nsụhọdeidem ye ifụre ifụre uku emi kpukpru nnyịn ikụtde.”

Ke ndondo oro akwa owo ukpeme ọkọfiọkde aban̄a edu edidianakiet eke Mme Ntiense Jehovah, enye ama ebiere ete ke ikoyomke ẹdụn̄ọde mme ubomisọn̄ “koro,” nte enye ọkọdọhọde, “mbufo ẹmediọn̄ọ idem etieti.” Mmọdo, ẹma ẹyak mme ubomisọn̄ oro ẹkenyenede idiọn̄ọ oro “JW” ẹbe ẹdụk ye unana edidụn̄ọde.

Ke utịt mbono oro, akwa owo ukpeme oro ama ọdọhọ ete ke imọ imodori enyịn Mme Ntiense ndifiak ndi ke mîbịghike. “Akananam nnyịn ikwe mme owo ẹmi ẹnyenede eti edu uwem ntem,” nte enye ọkọdọhọde. “Mbufo ẹtie nte Abasi oyomde nnyịn itie.” Utọ itoro oro edi ntak efen efen ọnọ mme ata Christian ‘ndikama idem nte odotde,’ man mme owo ‘ẹkpeda nti ido mmọ ẹmi ẹkụtde ẹnọ Abasi ubọn̄.’—1 Peter 2:12.