Ima Emi Ọsọn̄de Akan eke Eka

MME eka ke ẹtomo mbufa nsek nditọ mmọ ẹduọn̄ọ ke mme usụn̄ idakisọn̄, ke mme itie ukaikọt mbio obio, m̀mê ke mme efak oro mme owo ẹyọhọde. Ndusụk ini, mme emen mbio ẹsikam ẹkụt nsek nditọ ke n̄kpọ udọn̄ mbio ẹmi ẹma ẹkekpa mba nditua nyom mme eka mmọ. Nte O Estado de S. Paulo ọdọhọde, “ibat nsek nditọ oro ẹtomode ẹduọn̄ọ ke mme efak ke ọkọri.” Edi akpanikọ, ekpri eka emi ekeme nditua n̄kpọfiọk mban̄a ubiere esie ke ukperedem. Edi enye anam emi, idem okposụkedi emi ekemede ndida uwem eyen esie.

Afo emekeme ndikere, ‘Didie ke eka ekeme ndikam n̄kekere nditop nsek eyen esie nduọk ye unana edifiọk se iditịbede ke ini iso?’ Bible ada utọ mfụhọ mfụhọ idaha oro nte uwụtn̄kpọ ndiwụt akamba ukpụhọde oro odude ke nte Andibot ekerede aban̄a mbon oro ẹdide eke esie: “Nte n̄wan ekeme ndifre nsek-eyen esiemọ, nnyụn̄ ntre nditua eyen emi enye amande mbọm? Idem mmọ ẹkeme ndifre, edi ami ndifreke fi.”—Isaiah 49:15.

Ke akpanikọ, ke akande eka owo ekededi, Abasi enyene ntotụn̄ọ ima ọnọ nnyịn onyụn̄ ekere aban̄a mme udọn̄ nnyịn. Edide afo edi akparawa m̀mê akwa owo, mfịna ekededi oro afo osobode, afo emenyene un̄wam. Andibot fi enyene udọn̄ ndin̄wam fi ndien enye ekere aban̄a mfọnọn̄kpọ fo. Andiwet psalm ọkọdọhọ ete: “Koro ete mi ye eka mi ẹkekpọn̄de mi, ndien Jehovah emen mi akama.”—Psalm 27:10.

Ke ofụri ererimbot, ẹsio magazine Enyọn̄-Ukpeme ye Awake! man ẹnọ ifiọk “ata Abasi kierakiet,” kpa Jehovah, ye Eyen esie, Jesus Christ, emi ekemede ndiwọrọ nsinsi uwem nnọ mbon oro ẹbọde enye ye esịtekọm.—John 17:3.