Nso orụk Enyịn̄ Ke Afo Enyene?

KE BIBLE, ikọ oro “enyịn̄” ndusụk ini etịn̄ aban̄a etop oro owo ọwọrọde. Ke uwụtn̄kpọ, enyene-ọniọn̄ Edidem Solomon ekewet ete: “Eti enyịn̄ ọfọn akan eti aran; kpa ntre ke usen n̄kpa owo akan usen emana owo.” (Ecclesiastes 7:1; men Mme N̄ke 22:1 domo.) Nte ekemde ye mme ikọ Solomon, owo idahada eti enyịn̄ imana. Utu ke oro, edi ke ini uwem ke owo ọwọrọ etop oro enen̄erede enyene se ọwọrọde. Enyịn̄ esie anam ẹdiọn̄ọ enye kaban̄a ọkpọkpọ edu esie, m̀mê enye atat ubọk m̀mê edi ibụk, okop mbọm m̀mê anana esịt mbọm, osụhọde idem m̀mê okohode idem, akam edi edinen m̀mê idiọk owo.

Kere ban̄a David. Ke ini ubọn̄ esie, enye ama okop odudu inyụn̄ iyokke. Ke ukem ini oro, David ke nsụhọdeidem ama enyịme mme ndudue esie onyụn̄ akabade esịt ọkpọn̄ ikpọ idiọkn̄kpọ esie. Ye eti ntak, prọfet Jehovah ama ọdọhọ ete ke David ekedi ‘owo eke ekemde esịt ye Abasi.’ (1 Samuel 13:14) Ekpri David ama enyenyene eti enyịn̄ ye Abasi.

Ke edide isio, Edidem Jehoram eke Judah ama anam idiọk enyịn̄ ọnọ idemesie. Enye ama ọwọn̄ọde mme andidu ke idak esie ọkpọn̄ utuakibuot Jehovah onyụn̄ akam anam ẹwot nditọete esie itiokiet ye ndusụk mbọn̄ Judah. Ke akpatre, Jehovah ama ọtọ Jehoram udọn̄ọ oro okponde ubiak emi akadade okosụn̄ọ ke n̄kpa esie. Bible ọdọhọ ete ke Jehoram “adaha, ndien mmọ isemeke enye,” m̀mê nte Today’s English Version esịnde enye, “owo ndomokiet ikokopke mbọm ke ini enye akakpade.”—2 Chronicles 21:20.

Usụn̄ uwem David ye Jehoram ẹwụt akpanikọ eke n̄ke Bible oro: “Ke ini ẹtide eti owo, ẹyetoro enye: edi enyịn̄ mme idiọk owo oyobu.” (Mme N̄ke 10:7) Owo nnyịn kiet kiet ke ntre ekpenyene ndinen̄ede n̄kere mban̄a mbụme emi, ‘Nso orụk enyịn̄ ke ami nnam ye Abasi ye ekemmọ owo?’