“Nnyịn Mbon Catholic Imenyene Ekese Ndikpep Nto Mmọ”
ANDIKPEP kiet ke Bari, Italy, eketịn̄ ikọ emi aban̄a Mme Ntiense Jehovah ke ini enye ekekpepde nditọ akamba ufọkn̄wed n̄kpọ aban̄a mbụk ido ukpono. Andikpep oro ama asian nditọ ufọkn̄wed ete ke imọ idisida kaset vidio nte un̄wam unọ ukpep. Ke okopde emi, kiet ke otu nditọ ufọkn̄wed oro, Roberto edide isua 18 ke emana, ama ọnọ ekikere ete ẹsịn ido ukpono imọ ke nneme oro. Enye ama ọnọ andikpep oro vidio oro Jehovah’s Witnesses—The Organization Behind the Name. Enye ama ọbọ se Roberto ọkọnọde, ndien ofụri ubet ukpepn̄kpọ edide n̄kpọ nte nditọ ufọkn̄wed 30 ẹma ẹse vidio oro. “Edidianakiet, ndutịm, ye ntotụn̄ọ ima oro odude ke otu Mme Ntiense Jehovah ama otụk kpukpru owo,” ntem ke Roberto ọdọhọ. “Ama akam etịm akpa mmọ idem ndifiọk nte ke ẹsimịn̄ idem Enyọn̄-Ukpeme miliọn 40 ye idem Awake! miliọn 36 ke ọfiọn̄ kiet kiet.”
“N̄kekereke ke mbufo ẹmenen̄ede ẹnyene ndutịm ntre,” ntre ke ediwak nsan̄a ubet ukpepn̄kpọ Roberto ẹkedọhọ ke ẹma ẹkese vidio oro. Kaban̄a Mme Ntiense Jehovah, andikpep oro ọkọdọhọ nditọ ubet ukpepn̄kpọ oro ete: “Ẹse nte mbuọtidem mmọ onụkde mmọ ndinen̄ede ndiana kiet nnyụn̄ nnyene ndutịm. Nnyịn mbon Catholic imenyene ekese ndikpep nto mmọ.” Vidio oro ye nneme ubet ukpepn̄kpọ oro eketienede ama anam ekese ndinam ẹtịm ẹdiọn̄ọ Mme Ntiense Jehovah.