Ndi Kpukpru Mme Ọkwọrọ Ederi Ẹnịm Se Mmọ Ẹkpepde Ke Akpanikọ?
EBE n̄wan oro ndisụk n̄kpa edi oro. Oku mmọ anam an̄wan̄a nte ke ebe esie ikọfọnke ikem ndika heaven nnennen ke ikonyụn̄ idiọkke ikem ndidi se ẹnọde aka ikan̄ hell. Ntre, nte oku emi ọdọhọde, enye ke ọbọ ufen tutu enye odot ndika heaven. Enye ekpe oku emi okụk ete ọbọn̄ akam man otodo ẹkpesọp ẹsio ebe esie ke itie edinam asana. Ebeakpa emi oyụhọ ye emi, ekerede ke oku emi enyene mme ukem edinịm ke akpanikọ ofụri esịt imọ.
Ndi afo emekere ke idotenyịn ebeakpa oro ayakpa mfụhọ edieke enye ọfiọkde ete ke oku mmọ ikenen̄ekede inịm owo ndibọ ufen ke ama akakpa ke akpanikọ? Afịna ediwak owo ndifiọk nte ke ata ediwak mme ọkwọrọ ederi inịmke ata ediwak se mmọ ke idemmọ ẹkpepde ke akpanikọ. National Catholic Reporter, ke etịn̄de aban̄a se enye okotde “mfịna mme ọkwọrọ ederi oro ọdiọkde akan eke idan̄,” ọkọdọhọ ete: “Ke otu mme ọkwọrọ ederi ke ofụri ofụri, odu ediwak ẹmi ẹma ẹketre ndinịm ke Abasi odu m̀mê ukpepn̄kpọ aban̄ade mme utịp ye ufen m̀mê ediset ke n̄kpa ke akpanikọ . . . anam unana edinịm ke akpanikọ emi amakabade edi akpan ubak usụn̄ ukere n̄kpọ mme ọkwọrọ ederi, ebietde idiọk ofụm.”
Mme ufọkabasi eken ẹsobo mme ukem ọkpọsọn̄ mfịna oro. Ndụn̄ọde oro ẹkenamde ye mme ọkwọrọ ederi Ufọkabasi England ama ayarade ete ke ediwak “inịmke mme akpan ikpehe akpa ukpepn̄kpọ ido ukpono Christian nte edimana nto n̄wan emi mîfiọkke eren, mme utịben̄kpọ Jesus ye edifiak ndi messiah,” ntre ke The Canberra Times eke Australia ọtọt.
Ewetn̄kpọ mban̄a ido ukpono oro George R. Plagenz ama obụp nte ọkwọrọ ederi ekpekemede nditịn̄ mme ikọ mbuọtidem ẹmi enye ke idemesie mînịmke ke akpanikọ ye eti ubieresịt. Ọkwọrọ ederi kiet ọkọdọhọ ke imọ n̄kukụre imesikpụhọ mme ntọn̄ọ ikọ mbuọtidem oro, “Ami nnịm.” Enye ọkọdọhọ ete: “Nsitọn̄ọ ikọ mbuọtidem ke ndidọhọ, ‘MMỌ ẹnịm Ata Ọkpọsọn̄ Abasi Ete ke akpanikọ . . .’” Plagenz okokot orụk mbubịk oro “n̄kponn̄kan abian̄a ke idụt emi.”
Ke mfụhọ, utọ unana edinịm ke akpanikọ ye unana edinam akpanikọ eke mme ọkwọrọ ederi oro anam ediwak owo ikopke inemesịt iban̄a ido ukpono ke ofụri ofụri. Edi enye idịghe n̄kukụre ikpehe oro afịnade owo kaban̄a ido ukpono mfịn. Ẹmekpep ata ediwak mme aka ufọkabasi nte ke Bible edi Ikọ Abasi. Ndi ayakpa mmọ idem ndifiọk nte ke owo ikpepke ndusụk ukpepn̄kpọ ufọkabasi oro ẹma ẹkenyịme ke anyan ini ke Bible? Ibuotikọ oro etienede mi eyeneme uwụtn̄kpọ kiet.