Mme Idiọn̄ọ Ndausụn̄ Ke Usụn̄ Uwem

EDIEKE afo akpasan̄ade ke esen esen usụn̄ m̀mê afan̄usụn̄, ndi afo akpada mme idiọn̄ọ ndausụn̄ nte n̄kpọ ubiọn̄ọ? Eyedi ukpadaha! Ke akpanikọ afo akpada mmọ nte n̄kpọ un̄wam ndin̄wam fi okûyo ọkpọn̄ usụn̄ adade esịm ebiet emi akade.

Nte ededi, nso kaban̄a ndisan̄a ke usụn̄ oro adade esịm uwem? Nte ẹkeme ndisan̄a ke enye uforo uforo ke mme idiọn̄ọ ndausụn̄ mîdụhe? Prọfet Abasi eke eset ama etịn̄ aban̄a unana ukeme ubonowo ke afan̄ emi. Enye ọkọdọhọ ete: “Mmọfiọk, O ỌBỌN̄, nte ke owo ikemeke ndimek usụn̄ esie; inyụn̄ idịghe owo enyene ndibiere usụn̄ uwem esie.”—Jeremiah 10:23, The New English Bible.

M̀mọ̀n̄, ndien, ke ẹkeme ndikụt ndausụn̄ oro ẹyomde? Ebiet emi utọ ndausụn̄ oro ẹkemede ndiberi edem do otode edi Andibot owo, ndien ẹkeme ndikụt mme ndamban̄a idiọn̄ọ ndausụn̄ ẹmi ke Bible. Jehovah, ebede ke Ikọ esie, ọdọhọ ete: “Utọn̄ fo oyokop uyo ke edem fo, ete, ‘Emi edi ọkpọusụn̄, mbufo ẹsan̄a ke esịt,’ ke mbufo ẹdiwọn̄ọrede ẹka nnasia, m̀mê ẹnyụn̄ ẹka ufien.”—Isaiah 30:21.

Ih, Ikọ Abasi ọnọ ndausụn̄ oro ẹkemede ndiberi edem ke kpukpru ikpehe uwem nnyịn. (Isaiah 48:17; 2 Timothy 3:16, 17) Nte ededi, ke mfụhọ, n̄wakn̄kan ke otu ubonowo ẹsan̄a ke usụn̄ uwem ye unana ediberi edem ke ndausụn̄ Abasi. (Matthew 7:13) Kpa ye oro, mme idiọn̄ọ ndausụn̄ ẹmi ẹdu ke itie mmọ ke usụn̄ oro owo mîkemeke ndimen mfep! Nte afo eyetịn̄ enyịn ke mmọ nte afo asan̄ade ke usụn̄ oro adade esịm uwem?