Ekọn̄ Oro Akabiatde Ọyọhọ Isua Ikie 19

KE ETIEDE ekere aban̄a obufa tọsịn isua, Charley Reese, ewetmbụk n̄kpọntịbe nnọ The Orlando Sentinel, ama ewet ete: “Ekọn̄ 1914-18 oro akabiatde ọyọhọ isua ikie 19 ikụreke.” Nso ke ikọ esie ọkọwọrọ? Enye ama anam an̄wan̄a ete: “Mbụk idịghe se n̄wed usenọfiọn̄ akarade. Ọyọhọ isua ikie 19—emi ẹdọhọde nte mme edinịm ke akpanikọ, mme ekikere, mme edu edinam ye mme ido uwem ẹketọn̄ọde—iketreke ke Jan. 1, 1901. Enye eketre ke 1914. Oro n̄ko edi ini emi ọyọhọ isua ikie 20, emi etịn̄de ẹban̄a ke ukem usụn̄ oro, ọkọtọn̄ọde. . . .

“Ekpere ndidi kpukpru en̄wan oro nnyịn ikerede iban̄a ke ofụri uwem nnyịn ẹketọn̄ọ ẹto ekọn̄ oro. Ayak esisịt ndidi kpukpru mbufiọk ye ntụhọ edu edinam oro nnyịn idade idu uwem ẹketọn̄ọ ẹto ekọn̄ oro. . . .

“N̄kere ke enye akakama mbiara ntre sia enye akabiatde edinịm ke akpanikọ oro mme owo ẹkenịmde nte ke mme owo ẹkeme ndikara se itịbede inọ mmọ. . . . Ekọn̄ oro ama anam mme owo ẹduọk se ẹkenịmde oro ke akpanikọ. Baba owo kiet ke edem mbiba ikekereke ke se iketịbede oro eyetịbe. Enye ama osobo mme obio ukara Britain ye France. Enye ama owot ofụri mfọnn̄kan emana irenowo oro ke Britain, France ye Germany. . . . Ke ekpri ibio ini, enye ama owot owo miliọn 11.”

Ke se ibede isua 120, Mme Ntiense Jehovah ẹnyan ubọk ẹwụt 1914 nte edide utịt ke se Jesus okokotde “ini mme Gentile.” (Luke 21:24) Ke isua oro, ẹma ẹdori Jesus Christ oro ẹkenamde eset ẹkenyụn̄ ẹnọde ubọn̄ ke ebekpo nte Edidem Obio Ubọn̄ heaven. Ebede ke Obio Ubọn̄ oro, Jehovah Abasi oyosio kpukpru ndutụhọ oro ẹnịmde isua ikie emi idiọn̄ọ efep ke nsinsi.—Psalm 37:10, 11; Ecclesiastes 8:9; Ediyarade 21:3, 4.

1914

[Ebiet Ẹdade Ndise Ẹto ke page 32]

Foto U.S. National Archives