“Ẹsọn̄ọ Ẹmụm Se Mbufo Ẹnyenede Ẹkama”
Otu Mme Ntiense ẹkekwọrọ ikọ ke kiet ke otu isuo 30 oro ẹnamde mme Isuo Cyclades eke Greece. Nte owo iba ke otu mmọ ẹkekwọrọde ikọ ke efak oro, mmọ ẹma ẹsobo ye bodisi oro ọkọdọhọde mmọ ẹtiene imọ ẹka itieutom mme bodisi. Esisịt ini ke mmọ ẹma ẹkesịm itieutom mme bodisi, n̄kanika urụk ukopikọ ama amia. Ekedi oku obio-in̄wan̄ oro. Enye ama ọdọhọ ete: “N̄kop nte ke Mme Ntiense Jehovah mmọdo ke obio-in̄wan̄ emi.” Bodisi oro ama ọbọrọ ete: “Ih, iba mmọmi ye ami.” “Ke ndi do idaha idaha emi.” Etienede nte ukot nneme oro akakade, nditọete oro ẹma ẹkop ndịk esisịt.
Nte ededi, ke ini enye akakade ekesịm, oku oro ama atuak inua imam, ọkọm mmọ ubọk, onyụn̄ osụhọde etetie ke n̄kpọitie ekpere bodisi oro. Nte nneme akakade iso, bodisi oro ama akabade etie mfan̄a mfan̄a ke adan̄aemi oku oro okosụk owụtde eti ibuot ye edikere mban̄a. Enye ama ọdọhọ bodisi oro ete yak enye okûse Mme Ntiense ke usụhọde, onyụn̄ adian ete: “Mmọ ẹkeme ndibọrọ mbụme ekededi koro mmọ ẹbọde ukpep ke Ufọkn̄wed Utom Ukara Abasi. Ekpedi ata mmemmem n̄kpọ ndiwụri ererimbot akan ndikpụhọde mbuọtidem owo edide Ntiense Jehovah.”
Ke adan̄aemi ẹkwọrọde ikọ ke usenubọk ndan̄nsiere oro, nditọete oro ẹma ẹsobo ye oku oro ẹnyụn̄ ẹbụp enye ẹte: “Ntak emi afo eketiede ufan ufan ntre ye nnyịn ke ini nneme oro ke itieutom mme bodisi?” Oku oro ama asian mmọ ete ke imọ ima imehe ye ediwak Ntiense ke Syros ye nte ke imọ imesikot magazine Enyọn̄-Ukpeme ye Awake! ke ediwak isua. Ke akpanikọ, ke ediwak idaha enye esimen magazine Enyọn̄-Ukpeme, edịp ke efọk n̄wed, onyụn̄ ada ọkwọrọ ikọ esie ke ufọkabasi. Enye ọkọdọhọ ete: “N̄kereke ke uwem mi ọkpọfọn edieke mmen̄kpenyeneke mme n̄wed mbufo. Se inọde mi idotenyịn edi oro.”
Ekem, oku oro ama ọdọhọ Mme Ntiense oro ete: “Ana ntịn̄ n̄kpọ kiet nnọ mbufo. Ẹsọn̄ọ ẹmụm se mbufo ẹnyenede ẹkama. Ẹkûnam ndudue ẹkpọn̄ enye. Se ntịn̄de nnọ mbufo idahaemi edi mfọnn̄kan ikọ oro akanam n̄kwọrọde, ndien ntịn̄ke emi ke inua kpọt; ntịn̄ enye ke ofụri esịt mi.”