Utom Oro “Edemerede Ukpono”

APOSTLE Peter ọkọnọ mme ekemmọ Christian item ete: “Ẹkama idem nte odotde ke iso mme Gentile, man ke nde eke mmọ ẹtịn̄de n̄kpọ ẹbiat mbufo ẹte ẹdi mme anam-idiọk, mmọ ẹkpeda nti ido mbufo, ẹmi ẹdikụtde ke ini eke ẹdide ndidomo mbufo nse, ẹnọ Abasi ubọn̄.” (1 Peter 2:12) Ke ediwak isua Mme Ntiense Jehovah ke Italy ẹwụt utọ eti edu oro an̄wan̄wa. Ke edu eke item Jesus oro nte “ẹkwọrọ ke enyọn̄ ọkọm ufọk,” mmọ ẹnam kpukpru utom Christian mmọ ke eferife, ke enyịn kpukpru owo. (Matthew 10:27; John 18:20) Mmọdo, ke ini ekpeibet kiet ye oku kiet ẹmi ẹdide mbon Italy ẹkewetde edori ikọ nte ke Mme Ntiense Jehovah ẹdi “nsunsu n̄ka ido ukpono” ẹnyụn̄ ẹbat mmọ ẹsịn ke otu “ndedịbe n̄ka oro ẹtapde mme owo,” Mme Ntiense ẹma ẹbiere ndinam n̄kpọ nte ekemde ye ibet ke ntak edori ikọ oro.

Ke akpa usen ikpe, esop ama ebiere ete ke ekpeibet oro ye oku oro ikabiatke ibet ndomokiet. Nte ededi, ke July 17, 1997, Esop Usion̄o Ikpe eke Venice ama abiat ubiere akpa esopikpe oro efep, obiomde mme akan̄idem mbiba oro ikpe. Esop Usion̄o Ikpe ọkọdọhọ ete: “Ibuotikọ mbiba oro ẹkemịn̄de do ẹsịne mme ikọ ye mme ubak udịmikọ oro ke akpanikọ ẹkemede ndibiat enyịn̄ mme andibuana ke ido ukpono ‘Mme Ntiense Jehovah.’ Ana in̄wan̄în̄wan̄ nte ke uduak ibuotikọ oro ekedi ndisuene mme andibuana ke enye an̄wan̄wa.” Esop oro ama ọdọhọ ete ke mme ibuotikọ oro “inyeneke unen oro ekemde ye ibet nditọt nnyụn̄ n̄kụt ndudue nnọ.” Esop ama adia mme abiat-owo-enyịn̄ oro isop onyụn̄ owụk mmọ ete ẹkpe ofụri ekọmurua oro ẹkebiatde ke esop, esịnede ofụri ubiatokụk oro Mme Ntiense ẹkebiatde ke ikpe mbiba oro.

Ke ubiereikpe esie oro ẹkewetde, Esop Usion̄o Ikpe eke Venice ama ọdọhọ ete: “Edi n̄kukụre ke ndisọn̄ọ n̄wụk nnyụn̄ n̄kpeme ofụri unen oro Ibet [Italy] ọnọde ke ẹkeme ndikpan mme orụk unana ediyọ ye ukwan̄ ifiopesịt ido ukpono.” Ubiere oro enyịme nte ke utom Mme Ntiense Jehovah idịghe ndedịbe m̀mê nsunsu. Esop oro ama ọdọhọ ete: “Ndibat Mme Ntiense nsịn ke otu ndedịbe n̄ka, ikam iwụtke ukpono inọ mme idaha oro edide akpanikọ ke mbụk, sia ido ukpono oro odude ke ediwak obio ye ntatara utom edikwọrọ ikọ n̄kabade owo esịt oro mme andibuana ke enye ẹnamde, akpan akpan ke mme Sunday ye mme usen nduọkodudu eken, edide se ẹtịmde ẹdiọn̄ọ onyụn̄ edemerede ukpono kaban̄a mme ukeme oro ẹsịnde, inamke n̄kpọ m̀mê nso ke owo ekeme ndikere mban̄a ukpepn̄kpọ oro ẹkwọrọde.” Ntem, mbụk ifịk ifịk ukwọrọikọ ye eti edu uwem eke Mme Ntiense Jehovah ke Italy ama an̄wam ndikan usua oro ẹnyenede ẹban̄a mmọ.—Matthew 5:14-16; 1 Peter 2:15.