Ntọt Mme Anditan̄a Obio Ubọn̄

Ndisụhọde Idem Ndu Uwem Ekekem ye Usụn̄ Jehovah

“MBUFO kpukpru sụn̄-sụn̄ mbio isọn̄ . . . ẹyom Jehovah.” Ikot emi prọfet Zephaniah, owo Hebrew, akatan̄ade ke se ibede isua ikie 26 ẹmi ẹkebede, osụk edi se ẹnọde mme owo ke ofụri ererimbot mfịn. (Zephaniah 2:3) Nso ke ọwọrọ ndiyom Jehovah? Ndinam emi ọtọn̄ọ ye edibọ ifiọk ata ye odu-uwem Abasi kierakiet, Jehovah.—Jeremiah 10:10; John 17:3.

Ndibọ ifiọk, nte ededi, ke idemesie idaha owo isịm idaha oro ẹnyịmede ke iso Abasi. Man ẹnyene mfọn Abasi, ana owo ada ifiọk emi anam n̄kpọ. Didie? Ebe ke enye, ke nsụhọdeidem ndinam ekikere ye edu uwem esie ẹkekem ye mme idaha Abasi, nte ẹnamde an̄wan̄a ke ifiọk n̄kpọntịbe otode Suriname emi etienede mi.—Ephesus 4:22-24.

Eddy, andikpep oro odude ke ufọt iduọk isua 30 esie, ama enen̄ede oyom mme ibọrọ oro ẹnọde uyụhọ ke mme mbụme nte: ‘Nso udeme ke ido ukpono enyene ke n̄kaowo mfịn?’ ye ‘Ndi Bible, n̄wed eset, enyịme ye ifiọk ntaifiọk eyomfịn?’ Ke ini Mme Ntiense Jehovah ẹkekade ẹkenọ enye ibọrọ oro ọkọn̄ọde ke Bible kaban̄a mme mbụme ẹmi, Eddy ama enen̄ede ọnọ n̄kpan̄utọn̄. Enye ama akam ewet mme n̄kpọ enịm man akpafiak odụn̄ọde se Mme Ntiense oro ẹkenamde an̄wan̄a.

Ke mbemiso, Eddy ama abuana ye ufọkabasi oro ekekpepde enye nte ke mme owo ẹkesụn̄ọ ẹto Abasi ndifiak ndiọn̄ mme nsimbo ebọk. Ntre ke ini Mme Ntiense oro ẹkenọde enye n̄wed oro Life—How Did It Get Here? By Evolution or by Creation? enye ama ọsọsọp ọbọ. In̄wan̄în̄wan̄ edinam mbụk Bible aban̄ade edibot mme n̄kpọ an̄wan̄a ke n̄wed oro ama otụk enye. Ebede ke ukpepn̄kpọ Bible esie, enye ama ediyụhọ nte ke imọ imokụt akpanikọ!

Edi idahaemi enye ama osobo idomo. Eddy okodụn̄ ke ufọk emi uyịpinọ ye unana edinam akpanikọ ekedide usụn̄ uwem. Ntem, ndinam edimek ama ana enye ke iso: edide enye nditiene mbiara usụn̄ uwem mbon oro enye odụn̄de kiet ke ubet, m̀mê ndisịn utọ edu uwem oro ke ufọn usụn̄ uwem oro ọnọde Abasi ubọn̄. Ke ọniọn̄, Eddy ekemek akpatre oro. Enye ama etre kpukpru idiọk nsan̄a onyụn̄ ọwọrọ ke ufọk oro.—1 Corinth 15:33, 34.

Eddy ama anam n̄kọri usọp usọp ke enye ama ọkọtọn̄ọ ndidụk mme mbono esop ke Ufọkmbono Obio Ubọn̄. Enye n̄ko ama anam n̄kọri ke ọfọn̄ ye ukamaidem esie onyụn̄ ọtọn̄ọ nditịn̄ se enye ekekpepde nnọ mme ufan ye iman esie. Ekem, idatesịt esie ama ọkọri ke ini ẹkenyịmede enye ndibuana ke ndikwọrọ “gospel” an̄wan̄wa. (Matthew 24:14; Utom 20:20) Ke December 1996 usen oro ẹkebetde ke anyan ini ama edisịm ke ini enye akayarade uyakidem esie ọnọ Jehovah ebe ke baptism mmọn̄.

Kpukpru isua, ediwak tọsịn ke mme itie ikie ẹmi ẹdide mbon oro ẹnyenede esịt akpanikọ ẹsiyere ikot ‘ndiyom Jehovah.’ Ke ndinam ntre, mmọ ẹkụt nte akpanikọ eke Mme N̄ke 22:4 edide akpanikọ, emi ọdọhọde ete: “Utịp nsụkesịt ye eke uten̄e Jehovah edi inyene, ye ukpono, ye uwem.” Ih, ebede ke ndisụhọde idem ndu uwem ekekem ye usụn̄ Jehovah, mme ama akpanikọ ẹdara utọ edidiọn̄ oro idahaemi, ẹnyụn̄ ẹsak iso ye mbuọtidem ẹse nsinsi edidiọn̄ mi ke isọn̄.—Psalm 37:29.

[Mme n̄wed ndise obio ke page 18]

(Ama oyom ndikụt nte enye enen̄erede etie, se n̄wed)

Inyan̄ Caribbean

GUYANA

SURINAME

FRENCH GUIANA

BRAZIL

[Ebiet Ẹdade N̄kpọ Ẹto]

Ekondo: Mountain High Maps® Copyright © 1997 Digital Wisdom, Inc.