Mbono “Usụn̄ Uwem Abasi” 1998-1999 ke Ekpere!
KE Nigeria ikpọn̄, ẹdiomi mbono 108 ọtọn̄ọde ke October 1998 esịm January 1999. Eyedi kiet ke otu mboho usen ita emi edidu ke obio emi mîyomke usụn̄ ikpọn̄ ufọk fo. Ke ata ediwak ebiet, ndutịm editọn̄ọ ke Friday ye ikwọukwak ke n̄kanika ebede 9 ke minit 20 usenubọk. Ke Saturday ye Sunday ndutịm ẹditọn̄ọ ye ikwọukwak ke n̄kanika usụkkiet usenubọk.
Ndutịm usenubọk Friday ọyọtọt n̄kọri ke ukwọrọikọ Obio Ubọn̄ ke nsio nsio ikpehe ererimbot. Ndien utịn̄ikọ ibuotikọ mbono oro, “Ufak Christ—Usụn̄ Oro Abasi Ọnọde Edinyan̄a,” oyodori nsọn̄uyo ke ibuotikọ mbono emi.
Ke uwemeyo nneme oro, “Mme Ete ye Eka—Ẹdọdiọn̄ Ẹsiak Usụn̄ Abasi ẹnọ Nditọ Mbufo,” ọyọnọ mme ekikere ke nte ẹkemede ndidemede udọn̄ n̄kpri owo ndima nnyụn̄ nnam n̄kpọ Jehovah. Ẹyeberi ndutịm uwemeyo ye utịn̄ikọ oro “Ndi Uwem Odu ke N̄kpa Ebede?”
Ndutịm usenubọk Saturday oyowụt utom unam mbet eke Mme Ntiense Jehovah ke ikpehe ita ke adiana ke adiana, “Ndin̄wam Mme Owo Ẹdụk Usụn̄ Oro Adade Esịm Uwem,” “N̄kpọ-Ata eke Edisịm Mme Owo,” ye “Ndikpep Mme Mbet Kpukpru se Christ Eketemede.” Ke utịt edinam usenubọk, ndutịm oyodu ọnọ mbufa mbet ndina baptism.
Utịn̄ikọ ediberede eke uwemeyo Saturday, “Ndinam Utom ye Anana-Utịt Uwem ke Ekikere,” eyesịn udọn̄ ọnọ nnyịn ndikere ke akam mban̄a ọkpọkpọ ntak oro inamde n̄kpọ Abasi. Utịn̄ikọ oro “Ndidara ‘Mme Ẹnọ ke Owo,’ Ẹmi Ẹkpepde Usụn̄ Abasi” ye “Ido—Ẹsio Akani Ẹduọk Ẹnyụn̄ Ẹmen Obufa Ẹsịne” ẹyedụn̄ọde ufan̄ikọ kiet kiet ke N̄wed Mbon Ephesus ibuot 4 ke usụn̄ esịnde un̄wana. Ekem, ẹyenọ eti item eke N̄wed Abasi ke utịn̄ikọ oro “Kpeme Idem ye Idiọkn̄kpọ Emi Odude ke Ererimbot” ye ke nneme ikpehe ita oro “Mme Uyen—Ẹtiene Usụn̄ Abasi.” Ẹyeberi edinam uwemeyo ye utịn̄ikọ oro “Andibot—Edu Esie ye Mme Usụn̄ Esie.”
Ndutịm usenubọk Sunday enyene nneme ikpehe ita oro edinemede mme akpatre ibuot n̄wed Ezekiel ọkọrọ ye ntịn̄nnịm ebuana oro mmọ ẹnyenede. Ẹyeberi edinam usenubọk ye drama oro ẹsịnede ọyọhọ ọyọhọ usịnen̄kpọ oro ọkọn̄ọde ke edinam akpanikọ eke mme uyen Hebrew ita. Akpan n̄kpọ ke mbono uwemeyo oro edidi utịn̄ikọ an̄wa, “N̄kukụre Usụn̄ Adade Esịm Nsinsi Uwem.”
Ke akpanikọ afo ọyọbọ ufọn ke n̄kan̄ eke spirit ke ndidu do ke ofụri usen ita oro. Ẹyedara afo ndidụk kpukpru ikpehe edinam, ẹmi ẹdinamde odu, nte ido edide, ke mfọn. Kaban̄a ebiet oro ekperede ufọk fo akan, ka Ufọkmbono Obio Ubọn̄ Mme Ntiense Jehovah n̄kann̄kụk mîdịghe wet mme andimịn̄ magazine emi.