“Toto ke Uyen Afo Ama Ọfiọk”

NTE ekemde ye ndụn̄ọde ifiọk ntaifiọk eke ndondo emi, nditịn̄ ikọ nnọ nsek nditọ esitụk n̄kọri mfre mmọ akamba akamba, oforide ukeme mmọ ndikere n̄kpọ, n̄kọk ibuot, nnyụn̄ n̄kọk mme mfịna. Emi enen̄ede edi ntre ke akpa isua uwem nsek eyen. International Herald Tribune ọtọt ete ke ndusụk mme anam ndụn̄ọde idahaemi ẹnịm ke akpanikọ ẹte ke “ibat ikọ emi nsek eyen okopde ke usen kiet kiet edi ata n̄wọrọnda n̄kpọ ndida mbiere ifiọk, edikụt unen ke ufọkn̄wed ye edinyene ukeme ke n̄kaowo ke ukperedem.”

Nte ededi, ana mme ikọ oro ẹtịn̄de-tịn̄ oto owo. Etie nte ekebe ndise m̀mê radio idịghe se ẹdade ẹkpụhọ.

Ekpepn̄kpọ kiet mban̄a esịp ke Ufọkn̄wed Ntaifiọk eke Washington ke Seattle, U.S.A. ama ọdọhọ ete: “Nnyịn idahaemi imọfiọk nte ke ndutịm esịp ẹtọn̄ọ ke ata ntọn̄ọ ntọn̄ọ ini uwem ye nte ke mfre nsek eyen ke ataata usụn̄ etetie ebet mme n̄kpọntịbe man ẹbiere nte ẹnamde mme ndutịm ẹmi. Nnyịn ikọdiọn̄ọke nte ndutịm emi abakde ọtọn̄ọ ibọhọke ke ata ndondo emi. Ke uwụtn̄kpọ, nsek nditọ ẹdiọn̄ọ uyo ikọ usem emana mmọ etisịm ọfiọn̄ itiokiet ke emana.”

Ndụn̄ọde afan̄a ye ntatara ekikere oro nte ke nsek nditọ ẹdikọri ke ifiọk edieke ẹkam ẹnọde mmọ ekese ima. Enye n̄ko owụt nte mme ete ye eka ẹdide akpan n̄kpọ ke n̄kọri eyen.

Emi anam ẹti mme ikọ leta eke odudu spirit emi apostle Paul ekewetde ọnọ Timothy ete: “Toto ke uyen afo ama ọfiọk Edisana N̄wed Abasi, emi ekemede ndinam fi ọwọrọ ọniọn̄ ọbọ edinyan̄a.” (Sịghisịghi ubọkn̄wed edi eke nnyịn.) Anaedi edisana n̄wed Abasi, ẹmi eka ye ekaeka esie oro ẹnịmde ke akpanikọ ẹketịn̄de ẹnọ uyen oro Timothy, ama enyene akpan udeme ke n̄kọri esie nte n̄wọrọnda asan̄autom Abasi.—2 Timothy 1:5; 3:15.