“Ẹkop Odudu Ẹnyụn̄ Ẹnam Ẹnịm Ke Akpanikọ”
“ỌTỌN̄ỌDE ke n̄kpọn̄, nyada enye nnam n̄kpọ ke utom ukwọrọikọ, koro mme mfan̄a ẹmi ẹdọn̄ọde ke enye ẹkop odudu ẹnyụn̄ ẹnam ẹnịm ke akpanikọ,” ntre ke kiet ke otu Mme Ntiense Jehovah otode France ekewet. Ntiense kiet otode United States ekewet ete: “Mma n̄kot enye ndondo oro ndien n̄kekemeke ndibet ndida enye nnam n̄kpọ ke utom ukwọrọikọ, nte nnyịn isobode ata ediwak owo ẹmi mînyeneke udọn̄ ẹmi n̄ko mînịmke Bible ke akpanikọ.” Nso ke mmọ ẹketịn̄ ẹban̄a? Ediye uduot ekpri n̄wed oro enyenede page 32 ẹkotde N̄wed Ofụri Owo, emi Watch Tower Society okosiode ke mme Mbono District “Mbuọtidem ke Ikọ Abasi” ẹmi ẹkenịmde ke 1997/98.
Ẹketịm n̄wed emi ye akpan otuowo ke ekikere—mbon oro ẹkemede ndidi ẹfiọk n̄wed ẹdi oro ẹdiọn̄ọde ata esisịt ẹban̄a Bible. Ediwak utọ owo oro ẹnyene mme akpan ekikere ẹban̄a Bible, okposụkedi akanam mmọ ke idem mmọ mîkotke enye. Uduak ediye uduot ekpri n̄wed emi edi ndinam andikot enịm ke akpanikọ nte, ke nsụhọde n̄kaha, odot ẹdụn̄ọde Bible. Ediye uduot ekpri n̄wed emi inyịkke andikot ndinyịme ekikere oro nte ke ẹkeda odudu spirit Abasi ẹwet Bible. Utu ke oro, enye ayak mme akpanikọ ẹtịn̄ ikọ ke idemmọ. Mme ikọ ẹdade idịghe ikpọ ikọ edi edi in̄wan̄in̄wan̄ ye nnennen.
Nte mme ikọ ẹmi ẹkotde ẹto ke enyọn̄ emi ẹwụtde, mbon ẹmi ẹkedude ke mme mbono oro ẹma ẹnyene ọkpọsọn̄ udọn̄ ndida ediye uduot ekpri n̄wed emi nnam n̄kpọ ke utom ukwọrọikọ mmọ. Ke uwụtn̄kpọ, ke France ẹma ẹdiomi akpan ubịnikọt unọ ikọ ntiense ẹnọ August 23 ye 24 ke ini ediwak tọsịn n̄kparawa ke mme itie ikie ẹmi ẹdide isenowo ẹketode ofụri ererimbot ẹdiboho ke Paris kaban̄a Usen N̄kparawa Ererimbot. N̄kpọ nte Mme Ntiense 2,500 (akpan akpan ọtọn̄ọde ke isua 16 esịm 30 ke emana) ẹma ẹnịm idem ediye uduot ekpri n̄wed oro 18,000 ke French, German, Ikọmbakara, Italian, Polish, ye Spanish.
Ke usụn̄ ekededi, ẹyak nnyịn ida ediye uduot ekpri n̄wed emi, N̄wed Ofụri Owo, inam n̄kpọ ke utom ukwọrọikọ nnyịn. N̄wed emi akpakam enyene ufọn ke ndinam mbon eti ibuot ẹnịm ke akpanikọ nte ke mmimọ ikpenyene ndidụn̄ọde Bible ke idem mmimọ.