Mme Dọkta, Mme Ebiereikpe, ye Mme Ntiense Jehovah

KO KE edem ke March 1995, Mme Ntiense Jehovah ẹma ẹse ẹban̄a mbono nneme iba ke Brazil. Uduak? Ndiyom edidianakiet mme ọfiọk ibọkusọbọ ye mme ọfiọk ibet ke ini owo udọn̄ọ ke ufọkibọk edide kiet ke otu Mme Ntiense Jehovah mînyụn̄ ikemeke ndibọ edikịm iyịp nsịn ke idem.—Utom 15:29.

Ke mfụhọ, ke ndusụk idaha mme dọkta ẹsifụmi mme udọn̄ mbon udọn̄ọ ẹdide Mme Ntiense ẹnyụn̄ ẹsiyom ewụhọ ẹto esopikpe ndinyịk edikịm iyịp nsịn ke idem. Ke mme utọ idaha oro Mme Ntiense ẹsida usụn̄ ekededi oro ekemde ye ibet ndikpeme idem mmọ. Nte ededi, mmọ ẹsima edidianakiet utu ke ntuaha. Ntem, mme mbono nneme oro ẹma ẹnam an̄wan̄a nte ke ediwak ukpụhọ ẹdade utu ke edikịm iyịp owo nsịn ke idem ẹdu ye nte ke Mme Ntiense Jehovah ẹsinyịme mmọ ẹmi ye inemesịt.a

Mboho Esop eke Obio Kaban̄a Ibọkusọbọ eke São Paulo ama ọsọsọn̄ọ idaha Mme Ntiense. Ke January 1995, enye ama ebiere ete edieke mfan̄a odude kaban̄a usọbọ emi dọkta otorode, owo udọn̄ọ enyene unen ndisịn enye nnyụn̄ mmek dọkta efen.

Nte odotde itoro, ediwak owo ke mme itie ikie ke n̄ka mme ọfiọk ibọkusọbọ ke Brazil ẹdu idahaemi ẹmi ẹduakde ndida usọbọ oro owo mîdaha iyịp nsọbọ mbon usọbọ oro ẹyomde emi. Ọtọn̄ọde ke mme mbono nneme oro ke March 1995, edidianakiet ke ufọt mme dọkta, mme ebiereikpe, ye Mme Ntiense Jehovah ke Brazil ọmọkọri ke n̄wọrọnda usụn̄. Ke 1997 n̄wedmbụk ibọkusọbọ Brazil oro Âmbito Hospitalar ama emịn̄ ibuotikọ oro ẹkesọn̄ọde ẹyịre ẹtịn̄ ẹban̄a edikpono unen Mme Ntiense Jehovah ke n̄kpọ aban̄ade iyịp. Ẹtịm ẹdiọn̄ọ idahaemi, nte Mme Esop eke Obio Kaban̄a Ibọkusọbọ eke mme Stet Rio de Janeiro ye São Paulo ọdọhọde, nte ke “utom mme dọkta ndikpeme uwem owo udọn̄ọ ikpakanke utom esie ndikpeme unen oro owo udọn̄ọ enyenede ndinam edimek.”

[Mme Ikọ idakisọn̄]