Ntak Mmọ Ẹnamde Emi?

KPUKPRU isua Mme Ntiense Jehovah ke ofụri ererimbot ẹsiboho ke mme itie tọsịn ke ikpọ mbono. Do, mmọ ẹsidara ebuana ọtọkiet ẹnyụn̄ ẹkop eti ndutịm item Bible. Ndusụk ẹsisịn akamba ukeme ndidụk ikpọ mbono ẹmi. Isua oko, ke uwụtn̄kpọ, ke Malawi ebe ye n̄wan ẹdude ke ufọt ufọt isua 60 mmọ, ọkọrọ ye eyen mmọ ye n̄wan esie ye nsekeyen, ẹma ẹwat kilomita 80 ke enan̄ukwak ndikodụk mbono. Mmọ ẹkekpọn̄ obio mmọ ke n̄kanika itiokiet usenubọk ẹnyụn̄ ẹkesịm an̄wa mbono hour 15 ke ukperedem.

Ke Mozambique, otu kiet ama asan̄a usen ita ke enan̄ukwak ndika mbono. Okoneyo kiet, nte mmọ ẹkenade ke an̄wa, mmọ ẹma ẹkop mme ekpe ẹkụnide ke mbọhọ oro. Okposụkedi mmọ ẹketopde ifia ke itie emi mme unam ẹmi ẹkedude, mme ekpe oro ẹma ẹdu ẹkpere tutu usiere. Ntiense en̄wen asan̄ade aka ukem mbono oro ama edisobo ekpe iso ye iso ke usụn̄. Enye ama atuak ada sụn̄-n̄ inyen̄ekede idem tutu ekpe oro aka ama. Ke mbono oro Mme Ntiense ẹmi ẹma ẹtịn̄ idara idara ẹban̄a nte ‘ẹkenyan̄ade mmọ ẹsio ke inua lion.’—2 Timothy 4:17.

Ediwak Mme Ntiense Jehovah ẹsisịn akamba ukeme ndidụk ikpọ mbono m̀mê idem mme mbono esop eke urua ke urua kaban̄a utuakibuot. Ntak-a? Mme ibuotikọ oro ẹtienede ẹyen̄wam fi ndifiọk ntak emi edisop idem ọtọkiet edide ata akpan n̄kpọ ntre.