Mmọ Ẹtoro Andibot Mmọ Ke Ndopuyo

UTỊN ndisop ẹdi n̄wọrọnda n̄kpọ ke obot. Edi edida n̄kụt utịn osụhọrede ke edem akpan Obot emi ke Ikpọ obot Apuan eke Tuscany, Italy, ke akpanikọ inyeneke mbiet.

Ke ẹdade nsannsan ẹkụt, etie nte utịn ososụhọde odụk obot oro utu ke ndisụhọde ke edem esie. Ntak-a? Koro etịn̄e obot oro enyene oto-obot itịghede emi etiede nte ẹtotụn̄ ẹsio ke obot oro. Ke akpanikọ, n̄wọrọnda ikpehe emi ọnọ enye enyịn̄ oro, Monte Forato—Obot Emi Ẹtịbide. Ke ntak isọn̄ asan̄ade akanade utịn, ikaba kpọt ke isua kiet kiet ke mbon ẹmi ẹsede ebe ke itịghede oro ẹkeme ndikụt utịn anamde nte iduọ idụk Monte Forato.

Ukem nte mme ikpehe edibotn̄kpọ eken, mme anana-uwem n̄kpọ ke enyọn̄ ẹtoro Andibot mmọ. Didie? Ke ukem usụn̄ emi ediye mbuwed ekemede ndida itoro nsọk andiwet enye. Ke nditịm ntịn̄, mme edibotn̄kpọ ke heaven ẹtịn̄ ẹban̄a odudu, ọniọn̄, ye akwa ubom Jehovah. Nte andiwet psalm esịnde, “mme heaven ke ẹbụk ubọn̄ Abasi, ikpaenyọn̄ onyụn̄ etịn̄ se ubọk esie anamde.” (Psalm 19:1; 69:34) Sia utịn ye mme anana-uwem n̄kpọ eken ẹtorode Andibot mmọ, adan̄a didie ndien ke nnyịn ikpanam ikan!—Psalm 148:1, 3, 12, 13.