Ibet Duop
BISHOP eke Gloucester ke England ama okụt ete ke se iwakde ikan mbahade iba ke otu mme ọkwọrọ ederi ke ikpehe esie ikekemeke nditịn̄ Ibet Duop, ndien mbahade 10 eke ikie ke otu mmọ ikọfiọkke ebiet emi ẹkemede ndikụt mmọ ke Bible. Edi oro ekedi isua 450 ẹmi ẹkebede. Nte idaha okpụhọde tọn̄ọde ke ini oro? Ikpụhọkede—nte ndụn̄ọde oro The Sunday Times eke ndondo emi akanamde ntomo ntomo aban̄a mme ọkwọrọ ederi Anglican ayararede.
Ke otu mme ọkwọrọ ederi 200 oro ẹkedụn̄ọrede, mbahade 34 eke ikie kpọt ẹkekeme nditịn̄ kpukpru Ibet Duop. Ke otu mbon eken, kiet ekekere ke mmọ ẹtie ukpan ukpan ẹkaha, ndien efen ọkọdọhọ ete ke mmọ ikemke ye mme n̄kpọ-ata ido uwem eyomfịn.
Ndi afo ọmọfiọk Ibet Duop m̀mê ebiet ẹkemede ndikụt mmọ? Ẹwet mmọ ke Exodus, udiana n̄wed eke Bible, mme akpa ufan̄ikọ 1-17 eke Ex ibuot 20. Ntak mûkotke mmọ? Se mmemmem usụn̄ ndibahade mmọ ndọn̄ ke otu mi. Akpa inan̄ oro ẹnyene ebuana ye utuakibuot nnyịn nnọ Abasi, ọyọhọ ition etịn̄ n̄kpọ aban̄a uwem ubon, ọyọhọ itiokiet esịm usụkkiet ẹban̄a itie ebuana nnyịn ye ekemmọ owo, ndien ọyọhọ duop edi n̄wọrọnda, anamde nnyịn idụn̄ọde esịt nnyịn, man ise se idide mme uduakesịt nnyịn. Se ibio ibio usụn̄ emi mme Christian ẹkpedade mme edumbet ẹmi ẹsịn ke edinam mi.
Akpa: Nọ Andibot nnyịn san̄asan̄a utuakibuot. Ọyọhọ iba: Kûkama ndisọi mbiet ke utuakibuot. Ọyọhọ ita: Kpukpru ini kpono nyụn̄ nọ enyịn̄ Abasi uku. Ọyọhọ inan̄: Nyene ini ndiwụk ekikere ke mme n̄kpọ eke spirit, ye unana ediyak n̄kpọ ẹwọn̄ọde fi ntịn̄enyịn. Ọyọhọ ition: Nditọ, ẹkpono mme ete ye eka mbufo. Ọyọhọ itiokiet: Kûwot owo. Ọyọhọ itiaba: Fep ndisịn efịbe. Ọyọhọ itiaita: Kûyịp inọ. Ọyọhọ usụkkiet: Tịn̄ akpanikọ. Ọyọhọ duop: Sọn isịnenyịn.
Ibet Duop ẹkedi ubak ndutịm ibet oro ẹkenọde Moses. Edi mme edumbet ẹmi mmọ ẹkamade ikpụhọkede. (Rome 6:14; Colossae 2:13, 14) Ke ntak emi, mme anditiene Jesus ẹma ẹsikot ẹto ẹnyụn̄ ẹtịn̄ ẹtụk Ibet Duop. (Rome 13:8-10) Uwem akpakama inemesịt—onyụn̄ anana n̄kpọndịk—didie ntem mfịn edieke kpukpru owo ẹkpewụtde ukpono ẹnọ ẹnyụn̄ ẹdade mme edumbet eke odudu spirit Abasi ẹmi ẹsịn ke edinam!