Mme Okoneyo Unana Idap Oro Ẹkenyenede Ufọn

IDEM ndidem ẹsinyene mme okoneyo unana idap. Ahasuerus, okopodudu andikara Persia ke ọyọhọ isua ikie ition M.E.N., ama enyene kiet ke otu mmọ. Ndusụk ke ekerede ete ke imọ ima ifụmi ndusụk mbiomo, enye ama ọdọhọ ẹda n̄wetnnịm n̄kpọ ubọn̄ ẹdikot ẹnọ imọ. Enye ama ọfiọk ete ke anam-akpanikọ asan̄autom oro, Mordecai, ama abiat odu uwotowo edi owo ikọnọhọ enye utịp. Ahasuerus ama ebiere ndinen̄ede ndudue emi usọp usọp. Eti utịp oro mme edinam esie ẹkenyenede ke idem ikọt Abasi owụt nte ke edi Abasi akanam edidem oro okûkeme ndide idap.—Esther 6:1-10.

Esop Mme Ntiense Jehovah ke mbenesụk obio Hermanus ke South Africa enyene ntak nditi itie Bible emi. Mmọ ẹkesisop idem ke ufọkmbono oro ẹkebọde ke ukpeokụk. Ke ediwak isua mmọ ẹma ẹdomo ndidep isọn̄ man ẹbọp Ufọkmbono Obio Ubọn̄ mmọ. Ke akpatre, ke 1991, Esop Obio ama ọnọ eti itie.

Nte ededi, ndusụk owo ẹma ẹfan̄a ẹte ẹkûnyam itie emi ẹnọ Mme Ntiense Jehovah. Ke ẹma ẹkemụm ẹnịm ke ediwak ọfiọn̄, ẹma ẹsian esop oro nte ke ẹma ẹdori ukpan isua ita ke ndinyam isọn̄ nnọ mme ufọkabasi, ndien ke ẹbiat ediomi unyam isọn̄ oro ẹfep. Ke May 1993 esop oro ama afiak ewet, ọdọhọde esop obio oro ete yak ẹfiak ẹkere ẹban̄a ubiere mmọ. Mmọ ẹma ẹbọ ibọrọ ke leta emi ẹkewetde udịm kiet kpọt, ẹdọhọde ẹte ke ukpan oro osụk ododu.

Ke October isua oro, kiet ke otu mme ọnọ item obio ikekemeke ndide idap ke okoneyo kiet. Enye ama ada ini oro ndikụbọde n̄kani n̄wetnnịm n̄kpọ esop obio ndise m̀mê odu n̄kpọ ekededi oro oyomde ẹkere ẹban̄a. Leta oro Mme Ntiense ẹkewetde ẹben̄e esop obio oro ẹte ẹfiak ẹkere ẹban̄a ubiere mmọ ama omụm ntịn̄enyịn esie. Ntem enye ama ebiere ndisịn n̄kpọ emi ke se mmọ ẹdinemede ke mbono mmọ efen. Enye okoyom ndiwụt nte ke Mme Ntiense Jehovah ẹma ẹsesịn eben̄e ẹyom isọn̄ mbemiso ẹkedoride ukpan ke edinyam isọn̄ nnọ mme ufọkabasi.

Nte ini akakade ẹma ẹnọ esop kpa isọn̄ oro ẹkebemde iso ẹnọ mmọ ke 1991! Enye odu ekpere usụn̄ mbakara, imiaha mme andibuana ke esop ye mbon oro ẹnyenede udọn̄ ufen ndisan̄a nsịm. Mmọ ẹma ẹbọp ediye Ufọkmbono Obio Ubọn̄, emi ẹkeyakde ẹnọ Jehovah ke October 5, 1996.

Ke adan̄aemi esop esemede aban̄a mfịna unana idap ọnọ item oro ke okoneyo oro, enye ekeme ndikop ndọn̄esịt nto akpanikọ oro nte ke Edidem Ahasuerus ama akam enyene kiet ntre. Ndien utịp ke idaha mbiba ẹmi ama enyene ufọn. Esop ke Hermanus enen̄ede owụt esịtekọm ndinyene Ufọkmbono Obio Ubọn̄ eke mmọ, kpa iwụk ebiet edisana utuakibuot ye itie unọ ukpep ukara Abasi ke ọwọrọetop obio mbenesụk emi.—Mme Hebrew 10:24, 25.