Ndikot ‘Mmọn̄ Nsio ke Udem’

N̄KE Bible kiet ọdọhọ ete: “Uduak ke esịt owo edi udem; edi owo mbufiọk oyokot enye osio.” (Mme N̄ke 20:5) Ke mme ini Bible ekedi ata ọkpọsọn̄ n̄kpọ ndinyene mmọn̄ akan nte edide mfịn ke ediwak idụt. Ke ini Jesus eketịn̄de ikọ ọnọ n̄wan a-Samaria, n̄wan oro okokot mmọn̄ osio ke obube mmọn̄ Jacob, kpa obube mmọn̄ oro okotụn̄ọde ke n̄kpọ nte mita 23!—John 4:5-15.

Nte Mme N̄ke 20:5 owụtde, mbufiọk oro ẹyomde man ẹdụri mme ntotụn̄ọ ekikere ye ntụk ẹmi ẹsịnede owo ke esịt ẹsio etie ukem ukem nte ukeme oro ẹyomde man ẹkot mmọn̄ ẹsio ke obube. Emi edi akpanikọ ke ediwak ikpehe ke uwem. Ke uwụtn̄kpọ, eyedi afo ọmọfiọk mme owo oro ẹma ẹkekọ ifiọk ye ifiọk n̄kpọntịbe ke ediwak isua ke uwem. Edieke mbon ẹmi mîmaha ndinọ item ke imaesịt ye unana edibeben̄e, ekeme ndiyom afo esịn udọn̄ ọnọ mmọ. Ebede ke ndiwụt udọn̄, ndibụp mme mbụme, nnyụn̄ nnam ndụn̄ọde ye usọ, afo, yak idọhọ, osụhọde bọket esịn ke ntotụn̄ọ obube ọniọn̄.

Item Mme N̄ke 20:5 edi akpanikọ n̄ko ke ubon. Ediwak ini, ẹsikop iban ndọ ẹdọhọde ẹte: “Ebe mi itịn̄ke inọ mi nte etiede enye ke idem!” Ebe ekeme ndidọhọ: “N̄wan osụk etie ndobo ndobo!” Ke mme utọ idaha ntre, oyom mbufiọk man odụri mme ntotụn̄ọ ekikere ẹmi ẹdude ke esịt nsan̄a ndọ osio. Mme mbụme ẹbụpde ye usọ (Nte n̄kpọ ama ọsọn̄ ye afo mfịn? Nso iketịbe? Didie ke n̄keme ndin̄wam?) ẹkeme ndinam ẹtọn̄ọ ntotụn̄ọ nneme. Ndiwụt utọ mbufiọk oro ọyọsọn̄ọ mbọbọ ndọ, adade ufọn ọsọk ebe ye n̄wan.