Afo Ekeme Ndiberi Edem ke Mme Un̄wọn̄ọ Anie?
KE 1893 otu nta mme etịn̄ n̄kpọ mban̄a n̄kaowo esịnede owo 74 ẹma ẹsop idem ke Mbono Uwụt N̄kpọurua Ofụri Ererimbot ke Chicago ndineme mban̄a ini iso. (Ẹwụt itie oro ẹkenịmde enye ke enyọn̄ emi.) Ke ẹdade ẹse isua 100 ke iso ẹkesịm 1993, mmọ ẹma ẹtịn̄ ntịn̄nnịm ikọ ẹtienede mi ke adianade ye mmọ eken: “Ediwak owo ẹyedu uwem ẹsịm isua 150.” “Ibat ufọk-n̄kpọkọbi oyosụhọde ndien ẹdibat usiondọ nte n̄kpọ eke mînyeneke ufọn.” “Ukara ayanam n̄kpọ ke mmemmem usụn̄, nte ata ikpọ idụt ẹsịnde idem kpukpru ini ndinam n̄kpọ emem.”
Ukem ntre, ke 1967 n̄wed oro ibuotikọ ọdọhọde The Year 2000 ama ebem iso etịn̄ ete: “Etisịm isua 2000, etie nte kọmputa eyedi ukem, anam n̄kpọ nte, m̀mê akan ndusụk ata n̄kokon̄ ukeme ifiọk ‘ebietde eke owo,’ ndusụk esịnede mme ukeme usọ ye obot.” “Ekikere aban̄ade owo ukwak oro ekọmurua mînen̄ekede ikpon emi anamde ekese utomufọk . . . etie nte se inen̄erede iwụt eti ibuot etisịm isua 2000.”
Unana ukeme ubonowo ndida n̄kụt mme n̄kpọntịbe ini iso okpụhọde akamba akamba ye ukeme oro Abasi enyenede. Ke uwụtn̄kpọ, men mme ntịn̄nnịm ikọ oro ẹkebemde iso ẹneme mi domo ye se Bible ekebemde iso etịn̄ ke se ikperede ndisịm isua ikie 20 ẹmi ẹkebede emi aban̄ade eyo nnyịn: “Mme owo ẹyedi mme ama idem, ye mme ama inyene; ẹnyụn̄ ẹbụre idiọk mbụre, ẹseri iseri, ẹsụn̄i isụn̄i, ẹsọn̄ ibuot ye ete ye eka, ẹnana esịtekọm, ẹnana uten̄e Abasi, ẹnana ima uduot owo; ẹnyụn̄ ẹbiat un̄wọn̄ọ; ẹma ebiari, ẹyak idiọkitọn̄ akan mmọ ubọk, ẹtie obom obom, ẹnyụn̄ ẹsua se ifọnde; mmọ ẹdi mme ada owo nnọ mme asua, ye mbon idiọk iwụk, ye mbon n̄kohodeidem; mmọ ẹma mbre ẹkan Abasi; ẹnyene enyọn̄ enyọn̄ ido uten̄e Abasi, edi isan̄ake n̄kpọ ye odudu eke odude ke uten̄e Abasi.”—2 Timothy 3:1-5.
Prọfesi Bible aban̄ade “ukperedem ini” mi akam edi kiet ke otu ediwak ẹmi ẹsude ke eyo nnyịn. Ikọ Abasi ama ebem iso etịn̄ ete ke “idiọn̄ọ” edidu Jesus eyesịne ekọn̄ ererimbot, akan̄, ndiọi udọn̄ọ, unyekisọn̄, ye edikwọrọ eti mbụk Obio Ubọn̄ Abasi ke ofụri ererimbot.—Matthew 24:3-14; Luke 21:11.
Mme un̄wọn̄ọ Abasi ndinen nnyụn̄ nnana ndudue ama onụk andiwet Bible kiet nditan̄a ke ediwak isua ikie ẹmi ẹkebede ete: “Baba eti ikọ kiet eke Jehovah Abasi mbufo ọkọdọhọde aban̄a mbufo, ikpụhu: kpukpru ẹma ẹsu ẹnọ mbufo, baba ikọ kiet ikpụhu ke esịt.”—Joshua 23:14.
Ih, nnyịn imekeme ndinịm ke akpanikọ nte ke kpukpru un̄wọn̄ọ Abasi ẹyesọp ndisu. Obio Ubọn̄ Abasi ayada utịt ọsọk udọn̄ọ, ubiatibet, mbumehe uda n̄kpọsọn̄ ibọk, biọn̄, ye ekọn̄—ofụri ererimbot edidi paradise. (Psalm 37:10, 11, 29; Ediyarade 21:3, 4) Afo emekeme ndidori enyịn ke edisu eke prọfesi emi! Enye oto Andibot nnyịn, “emi mîkemeke ndisu nsu.”—Titus 1:2; men Mme Hebrew 6:13-19 domo.
[Ebiet Ẹdade Ndise Ẹto ke page 32]
Cleveland State University Archive