Mme N̄wed, Mme N̄wed, Mme N̄wed!

“Edinam ediwak n̄wed inyeneke edikụre,” ntre ke enyene-ọniọn̄ Edidem Solomon eke eset ekewet. (Ecclesiastes 12:12) Ke 1995 ẹma ẹmịn̄ se ikperede ndidi obufa n̄wed kiet ẹnọ owo 580 ke otu mme andidụn̄ ke Britain, anamde idụt oro ada iso ke ererimbot ke ndimịn̄ mbufa n̄wed. China, idụt emi awakde owo akan, ekedi udiana ye nsiondi 92,972 ke ẹmende ẹdomo ye eke Britain emi edide 95,015. Germany adiana (mme ibuotikọ 67,206), ndien ekem United States etiene (49,276), ye efen edide France (41,234). N̄wedmbụk n̄kpọntịbe London oro The Daily Telegraph ọdọhọ: “Akpan ntak oro anamde Britain ada iso ke ererimbot edi n̄kukụre ke ntak Ikọmbakara.”

Ntọt owụt ete ke udep n̄wed osụhọde ubọk ke ediwak isua, ndien idahaemi mbahade 80 eke ikie kpọt ke otu ikpọ owo ke Britain ẹsidep n̄wed kiet m̀mê awakde akan oro ke isua kiet. Edi nte mme owo ẹsikot kpukpru n̄wed oro mmọ ẹdepde?

N̄wed kiet oro ẹkade iso ndisuan ntatara ntatara ẹnyụn̄ ẹkotde edi Bible, emi odude idahaemi ke mbak m̀mê ofụri ofụri ke se ibede usem 2,120. Edieke afo mûnyeneke idem kiet kan̄a, sobo ye ọfis Watch Tower Society emi ekperede fi akan man enyene kiet. Edieke afo enyenede Bible, sio enye di nyụn̄ se mme itien̄wed Abasi ẹmi ẹdude ke mme ibuotikọ ke magazine emi. Ke anamde ntre, afo oyokụt ifiọk Bible oro ọnọde uwem.