“Mme Ọsọn̄urua Akpanikọ”

“Mme ọsọn̄urua akpanikọ.” Oro edi nte leta kiet emi ẹkewetde ẹnọ ẹsọk n̄kọk itieutom Mme Ntiense Jehovah eke Nigeria eketịn̄de aban̄a akpan magazine iba. Andiwet, ekpri akparawa, anam an̄wan̄a ete:

“Ami n̄wet n̄wed emi ndinọ mbufo ekọm ofụri esịt mi kaban̄a mme ukeme oro mbufo ẹsịnde nditụk se ikperede ndidi kpukpru ikpehe uwem eke usen ke usen ebe ke mme magazine Enyọn̄-Ukpeme ye Awake!

“Ami ndi isua 17 ke emana. Isua oko ufọkutom radio n̄kann̄kụk ama odiomi udomo uwetn̄kpọ ke ibuotikọ oro ‘Ima Esịne Se Ikande Idan̄—AIDS Edi Ata Idem N̄kpọ.’ Uwetn̄kpọ kiet kiet ekenyene ndidi ikọ ikie inan̄. Ẹkenyene ndinọ uwetn̄kpọ oro ọfọnde akan naira 1,000 [$12.50, U.S.] nte enọ. Nte ededi, mmọ ẹkedọhọ ke mme owo ikpenyeneke ndiwet n̄kukụre man ẹbọ enọ edi, utu ke oro, man ẹkpep n̄kpọ. . . .

“Mma n̄kụt ntọt aban̄ade AIDS ke magazine mbiba ẹmi. Amaedi ima, akpakịp ibuotikọ ẹma ẹdu. Mma nsion̄o mme akpan n̄kpọ nto Awake! eke August 8, 1978.

“N̄kpasịp ọfiọn̄ iba ke mma n̄kọnọ uwetn̄kpọ mi ẹka, ẹma ẹsio ibọrọ. Ke n̄kpaidem mi, ami n̄kedi akpa ke stet Cross River ye Akwa Ibom!

“Kpukpru ntọt oro n̄kadade ẹketo mme magazine oro. Edi ata utịben̄kpọ nte ke Jehovah ọmọnọ nnyịn mme ekemini ntọt ke ntịme ntịme n̄kpakpa ererimbot emi. Nte mme ata Christian, nnyịn imọfiọk ite ke ata ekese odu ke ima akan idan̄. Ndien, nte ededi, ndidu edisana, eti uwem ekpeme nnyịn osio ke mme udọn̄ọ nte AIDS.

“Nyene ndikọm mbufo kaban̄a mme ọsọn̄urua akpanikọ ẹmi mbufo ẹsion̄ode ẹdi ye unana edikpa mba. Jehovah akpakam aka iso ndidiọn̄ mme ukeme mbufo nte mbufo ẹkade iso ndinọ mme ọsọn̄urua magazine ẹmi.”