Nte Edikọk Udọn̄ọ ke Utịbe Usụn̄ ke Osụk Etịbe?
“NYỊME Jesus ndien udọn̄ọ fo oyokụre!” Mme ikọ ntem ẹkenam Alexandre, owo ufọkabasi Evangelical, enịm ke akpanikọ nte ke ndida ibọk ke udọn̄ọ imọ ediwụt ke imọ inyeneke mbuọtidem. Enye ama enịm ke akpanikọ ete ke mbuọtidem imọ ikpọn̄ ayanam utịbe utịbe ukọk udọn̄ọ oro imọ iyomde ada itie. Benedita, ifịk ifịk owo Catholic, ama okop nduaidem ke ini enye okokopde aban̄a utịbe utịbe ukọk udọn̄ọ ke ufọkabasi Aparecida do Norte, ke stet São Paulo, Brazil. Ke atan̄ade ndusụk ikọ mfọni emi eyeneka eka esie eketemede enye, Benedita ama ọbọn̄ akam ọnọ Ọbọn̄an̄wan Nnyịn eke Aparecida, Anthony, ye “ndisana” owo eken oyom odudu ukọk udọn̄ọ.
Nte an̄wan̄ade, idem ke utịt utịt ọyọhọ isua ikie 20 emi, ediwak owo ke ẹsụk ẹnịm utịbe utịbe ukọk udọn̄ọ ke akpanikọ—edi ntak-a? Eyedi ndusụk owo ẹsikụt edikpu ke ini mme dọkta mîkemeke ndinam udọn̄ọ, ubiak, ye ndutụhọ mbonima mmọ ẹkụre, akpan akpan eke nditọ mmọ. Mbon oro ndiọi udọn̄ọ ẹnọmọde ẹkeme ndikere nte ke ntak oro ibọkusọbọ eyomfịn ọsọn̄de urua, ke n̄kpọ ndomokiet iditakke mmimọ ndiyom ukọk udọn̄ọ mbuọtidem. Ndusụk mmọ ẹsikụt nsio nsio ufọkabasi ye mme owo ke TV nte ẹn̄wọn̄ọde ndikọk AIDS, mfụhọ, kansa, idat, udọn̄ọ n̄kon̄n̄kon̄ iyịp, ye ediwak udọn̄ọ eken. Edide mmọ ẹnyene mbuọtidem ke mme utọ ikọ oro m̀mê inyeneke, mmọ ẹkeme ndika mbịne mmọ nte akpatre ebiet ndibọ un̄wam. N̄ko-n̄ko mbon eken oro ẹnịmde ke akpanikọ ẹte ke ndiọi odudu ẹdi ntak udọn̄ọ mmimọ ẹkeme ndikere nte ke ata ibọkusọbọ inyeneke odudu ndin̄wam mmọ.
Ke n̄kan̄ eken, odu mbon oro ẹnen̄erede ẹsua, idem ẹbiomde, ekikere oro nte ke “ndisana owo” ẹmi ẹma ẹkekpan̄a m̀mê mme ọkọk udọn̄ọ oro ẹdude uwem ẹsikọk udọn̄ọ ke utịbe utịbe usụn̄. Nte Jornal da Tarde ọdọhọde, Dráusio Varella, ekpep n̄kpọ mban̄a editịbe idem owo ekere ete ke se ẹnịmde ke akpanikọ oro “anam mbuọtidem mbon oro ẹkemede ndisọp mbian̄a ye mbon nnanenyịn okpu.” Enye adian do ete: “Ke ẹdoride enyịn ke mme utịben̄kpọ, ediwak owo ẹkeme ndifụmi akpan ibọkusọbọ ke ntak mme andibian̄a owo ẹmi.” Ndien The New Encyclopædia Britannica anam an̄wan̄a ete: “Ke eset ẹkemen ukọk udọn̄ọ ẹmi ẹwọrọde ẹkpọn̄ nnennen usụn̄ ẹkebuan ye ndisana ebiet ye mme edinam ido ukpono, ndien ifiọk ibọkusọbọ esima ndimen kpukpru utọ ukọk udọn̄ọ oro n̄kabuan ye oto-obot usụn̄ emi akarade mme edu edinam owo ke idak mme idaha oro ẹfọnde.” Edi, odu ediwak owo ẹmi ẹnịmde ke akpanikọ ẹte ke ẹma ẹkọk mmimọ udọn̄ọ ke utịbe usụn̄. Ye mmọ, ukọk udọn̄ọ enyene ufọn!
Mbon oro ẹmehede ye Bible ẹfiọk ẹte ke Jesus Christ ama ọkọk mbon udọn̄ọ ke ediwak idaha, anamde emi ebe ke ‘odudu Abasi.’ (Luke 9:42, 43) Ntem mmọ ẹkeme ndikere, ‘Nte odudu Abasi ke osụk ododu onyụn̄ ọkọk udọn̄ọ ke utịbe utịbe usụn̄ mfịn?’ Ke edide ntre, ntak emi mme ukeme ndikọk udọn̄ọ ẹsikpude ndida utịp oro ẹkedoride enyịn ndi? Nte edi koro owo udọn̄ọ mînyeneke mbuọtidem ikem m̀mê koro etịbe oro enye esịnde iwakke ikem? Nte odot Christian ndiyom utịbe utịbe ukọk udọn̄ọ ke ini enye okopde ubiak m̀mê enyenede udọn̄ọ oro owo mîkemeke ndikọk? Ndien nte utịbe utịbe ukọk udọn̄ọ oro mîkemeke ndikpu ebietde utọ oro Jesus akanamde ayafiak ada itie tutu amama? Afo emekeme ndinyene ibọrọ nnọ mme akpan mbụme ẹmi ke ibuotikọ oro etienede.