Di Mbono District “Mbuọtidem ke Ikọ Abasi”!
EDIWAK miliọn owo ẹyedu ke ediwak obio mbono ke mme itie ikie ke ofụri ererimbot. Ke Nigeria ikpọn̄, ẹnam ndutịm ẹnọ mme mbono 110. Akpa edidi ke October 10-12, 1997 ndien akpatre edidi January 16-18, 1998. Eyedi kiet ke otu mboho usen ita emi—Friday esịm Sunday—oyodu ke obio emi mîyomke usụn̄ ikpọn̄ ufọk fo.
Afo ọyọbọ ufọn oto akpakịp nti item Bible. Ndutịm editọn̄ọ ke usenubọk Friday ye ikwọ ke n̄kanika ke ebede 9 ke minit 20. Ke Saturday ye Sunday ndutịm editọn̄ọ ye ikwọ ke n̄kanika usụkkiet ke usenubọk kiet kiet. Ikpehe ndụn̄ọde minit 25 ye mme owo ẹmi mbuọtidem mmọ ke Ikọ Abasi otụkde uwem mmọ ntotụn̄ọ ntotụn̄ọ oyodu ke usenubọk Friday. Ẹyeberi akpa ikpehe edinam oro ye utịn̄ikọ ibuotikọ mbono, “Ndisan̄a ke Mbuọtidem, Idịghe ke Edikụt ke Enyịn.”
Akpa utịn̄ikọ uwemeyo Friday eyeneme akpan udeme oro mme uyen ẹnyenede ke esop Christian. Nneme ikpehe ita oro editienede eyeneme mme edumbet Bible nte mmọ ẹnyenede ebuana ye eduuwem Christian ke ikọinua, ido, ye ọkpọkpọ ukamaidem. Adianade do mme utịn̄ikọ oro “Kpeme Idem ye Unana Mbuọtidem” ye “Ikọ Abasi Enyene Uwem” ẹyewụk ntịn̄enyịn ke eti item odude ke Mme Hebrew ibuot 3 ye 4. Ẹyeberi ndutịm Friday ye nneme oro “N̄wed Ofụri Owo.”
Akpa utịn̄ikọ usenubọk Saturday edi “Mbuọtidem eke Mîsan̄ake ye Utom Akpa.” Akpan utịn̄ikọ efen ke usenubọk oro, “Dọn̄ N̄kam Nyụn̄ Sọn̄ọ Da ke Akpanikọ,” etịn̄ nte ẹkemede ndinyene n̄kọri eke spirit. Ikpehe oro esidude ofụri ini ke ikpọ mbono, “Mbuọtidem ke Ikọ Abasi Ada Ekesịm Baptism” edida ikpehe edinam oro ekeberi, ke oro okụrede ndutịm oyodu ọnọ mbufa mbet ndina baptism.
Utịn̄ikọ ediberede ke uwemeyo Saturday, “Ẹsọn̄ọ Ẹn̄wana Kaban̄a Ikọ Mbuọtidem,” edineme item n̄wed Jude eke Bible. Nneme ebịghide ke hour kiet ẹkotde “Nnyịn Iyaka ke Ufọk Jehovah” eyeneme aban̄a mme mbonoesop Christian. Ẹdiberi ndutịm usen oro ye nneme oro “Uduot Mbuọtidem Fo—Ke Ẹdomo Enye Idahaemi.”
Ndutịm usenubọk Sunday enyene nneme ikpehe ita oro edinemede n̄wed Joel eke Bible, esịnede nte enye enyenede ebuana ke eyo nnyịn. Ekem drama Bible ẹkotde “Nam Enyịn Fo Enen̄ede Ese” eyetiene. Akpan n̄kpọ udọn̄ mbono oro edi utịn̄ikọ an̄wa ke uwemeyo, “Mbuọtidem ye Ini Iso Fo.”
Ke akpanikọ afo ọyọbọ ufọn ke n̄kan̄ eke spirit ke ndidu do. Ẹyedara fi ke kpukpru ikpehe edinam. Nam ndutịm idahaemi ndidụk. Kaban̄a ebiet oro ekperede ufọk fo akan, ka Ufọkmbono Obio Ubọn̄ Mme Ntiense Jehovah n̄kann̄kụk mîdịghe wet mme andimịn̄ magazine emi. Afo n̄ko emekeme ndikụt mme adres obio mbono ke Nigeria ke nsiondi Enyọn̄-Ukpeme eke May 1.