Edinam Akpanikọ—Ke Mbuari M̀mê ke Edimemek?
“OKPOSỤKEDI ami nte ido edide mmendịghe anam akpanikọ, mmesinam akpanikọ ndusụk ini ke mbuari.” Ntre ke Autolycus emi edide obukpo owo etịn̄ ke The Winter’s Tale emi William Shakespeare ekewetde. Emi osio akpan mmeme owo owụt—kpa ntụhọ oro nnyịn inyenede ndinam idiọk, emi otode “esịt abian̄a.” (Jeremiah 17:9; Psalm 51:5; Rome 5:12) Edi nte emi ọwọrọ ke nnyịn inyeneke edimek ndinam ke n̄kpọ emi? Ndi edidu eti uwem edi sụk n̄kpọ oro etịbede ke mbuari? N̄wan̄ansa-o!
Mbemiso nditọ Israel ẹkedụkde Isọn̄ Un̄wọn̄ọ, Moses ama etịn̄ ikọ ọnọ mmọ ke adan̄aemi mmọ ẹkenamde nna ke unaisọn̄ Moab. Enye ama enịm mmọ n̄kpọ iba in̄wan̄în̄wan̄ ke iso ndimek. Mmọ ẹma ẹkeme ndisụk ibuot nnọ mme ewụhọ Abasi nnyụn̄ mbọ edidiọn̄ esie mîdịghe ẹsịn mme ewụhọ ẹmi ẹnyụn̄ ẹbọ ndotndot utịp idiọkn̄kpọ. (Deuteronomy 30:15-20) Mmọ ẹkenyene ndinam edimek.
Nte mbon oro ẹnyenede ifụre, nnyịn n̄ko imenyene edimek ndinam. Owo ndomokiet—kpa ye Abasi—inyịkke nnyịn ndinam eti m̀mê ndinam idiọk. Nte ededi, ndusụk owo ẹkeme ndibụp nte enende ẹte, ‘Edieke esịt nnyịn ẹsinyenede ntụhọ kaban̄a idiọkn̄kpọ, didie ke nnyịn ikeme ndinam se ifọnde?’ Ọfọn, abia edet ke ntịn̄enyịn esidụn̄ọde mme edet man ọdiọn̄ọ mbon oro ẹbiarade m̀mê oro obude mbemiso mbiara esie akade anyan. Ukem ntre, nnyịn inyene ndidụn̄ọde ndamban̄a esịt nnyịn nyom mme mmeme ye mbiara ido uwem. Ntak-a? Koro “mme idiọk ekikere ẹto ke esịt ẹwọn̄ọ, ye obom, ye efịbe, ye use, ye inọ, ye ikọ ntiense nsu, ye isụn̄i,” ntre ke Jesus eketịn̄.—Matthew 15:18-20.
Man ẹkpeme edet, ana abia edet osio mbumbu n̄kpọ ekededi oro okụtde ofụri ofụri. Kpasụk ntre, oyom ọkpọsọn̄ ubiere man ẹsio “mme idiọk ekikere” ye ndiọi udọn̄ ẹfep ke esịt. Ebede ke ndikot nnyụn̄ ntie n̄kere Ikọ Abasi, kpa Bible, idịghe sụk mme usụn̄ Andibot nnyịn kpọt ke nnyịn idiọn̄ọ edi nnyịn n̄ko imekpep ndinam se inende.—Isaiah 48:17.
Edidem David eke Israel ama ọbọ ufọn oto n̄kaiso un̄wam oro enye okoyomde ke en̄wan oro enye akan̄wanade ndinam se inende. Enye ọkọbọn̄ akam ete: “Bot edisana esịt nọ mi, O Abasi; nyụn̄ nam obufa spirit eke ọsọn̄ọde ada, sịn mi ke idem.” (Psalm 51:10) Ih, ebede ke ndiberi edem ke Jehovah Abasi ke akam, nnyịn n̄ko imekeme ndikan ntụhọ oro nnyịn inyenede ndinam se idiọkde inyụn̄ ikọri “obufa spirit” man inam se ifọnde. Ke usụn̄ emi, nnyịn idinamke akpanikọ ke mbuari. Enye edidi n̄kpọ oro ẹmekde-mek.
[Ndise ke page 21]
Nte ekedide ye David, ndibọn̄ akam nnọ Jehovah ekeme ndin̄wam nnyịn inam eti n̄kpọ