‘Nyọbuọt Idem ye Abasi’
KE “NDIỌKEYO” ẹmi, mme idomo ye mfịghe ẹtetịm ẹkọri. Ke uwụtn̄kpọ, ẹkeme ndidomo edinam akpanikọ nnyịn ke itieutom nse. Mme nsan̄a ufọkn̄wed ẹkeme ndidomo eti ido nnyịn. Ndien ererimbot oro abiarade ke n̄kan̄ ido uwem mi esiwak ndisịn nsọn̄ọnda nnyịn ke udomo.—2 Timothy 3:1-5.
Asaph andiwet Bible okodu uwem n̄ko ke ini idiọkido ọkọkọride. Ndusụk mbon iduọk ini esie ẹma ẹkam ẹnam inua ẹban̄a eduuwem unana uten̄e Abasi mmọ. “Iseri abana mmọ itọn̄ nte n̄kwa,” ntre ke Asaph ekewet. “Edisịnen̄kpọ nnama onyụn̄ ofụk mmọ. Mmọ ẹsak nsahi, ẹnyụn̄ ẹdọhọ idiọk: ẹtie ke enyọn̄ ẹtịn̄ ufịk.” (Psalm 73:6, 8) Ndi utọ edu emi edi n̄kpọ oro afo ọdiọn̄ọde?
Ye mbon oro ẹyomde ndinam se inende, utọ eduuwem oro edi ata n̄kpọ mfụhọ, idem edide n̄kpọ unana udọn̄. “N̄kụt ufen ofụri usen,” ntre ke Asaph ekeseme. “Nse enye ke n̄kpọ ukụt.” (Psalm 73:14, 16) Afo emekeme ndinyene ukem ekikere oro, edi kûduọk idotenyịn! Asaph ama ekeme ndiyọ idiọkido eke eyo esie, ndien afo emekeme ndinam kpasụk ntre. Edi didie?
Asaph ama edidiọn̄ọ ete ke etie nte imemke utom ndikụt ata unenikpe ke idak ukara anana mfọnmma owo. (Psalm 146:3, 4; Mme N̄ke 17:23) Ntre utu ke ndibiat ọsọn̄urua ini, odudu, ye inyene esie ndomo ndimen kpukpru idiọkido ẹkedude ẹkanade enye ẹkụk mfep, enye okowụk ntịn̄enyịn esie ke itie ebuana esie ye Abasi. Asaph ọkọdọhọ ete: “Amaedi ami, ọfọn mi ndikpere Abasi: mberedem ye Ọbọn̄ Jehovah.”—Psalm 73:28.
Mfịn, mbon oro ẹsịnde idem ke idiọk usụn̄ unam mme mbubehe ẹsiwak ndinyene ekese n̄kpọ ufọn ke n̄kan̄ obụkidem. Ediwak owo ẹkam ẹkeme ndinam inua mban̄a unana edikere oro mmọ mîkereke iban̄a ibet ido uwem eke Abasi. Edi mmọ idinyeneke edikan ke nsinsi. “Afo odori mmọ kpa ke mfọfiọnọ ebiet,” ntre ke Asaph ọkọdọhọ. “[Afo] ọduọk mmọ ke nditaha.”—Psalm 73:18.
Ih, ke edikem ini Abasi, abian̄a, afai, ye mbiara edinam, ọkọrọ ye kpukpru edinam unana uten̄e Abasi eken oro anade mme ata Christian ẹfep, ididụhe aba. Bible ọn̄wọn̄ọ ete: “Ẹyekpok mme idiọkowo ẹfep: edi mmọ eke ẹbetde Jehovah ẹyeda isọn̄ ẹnyene.” (Psalm 37:9) Kan̄a kemi, nnyịn ikpakam itiene itịn̄ mme ikọ andiwet psalm emi ọkọdọhọde ete: “Jehovah edi akwa itiat mi, ye ufọk ekọn̄ mi ye andinyan̄a mi; Abasi mi edi akwa itiat mi; nyọbuọt idem mi ye enye.”—Psalm 18:2.