Ntak Emi Ini Ẹmi Ẹdiọkde Ntem-E?
KE INI afo osụhọrede etetie ndikot n̄wedmbụk n̄kpọntịbe m̀mê okopde mbụk n̄kpọntịbe ẹnọde ke TV m̀mê akpan̄de utọn̄ ọnọ mbụk n̄kpọntịbe ẹkotde ke radio, afo emesidori enyịn ndikop idiọk mbụk, nte afo usudorike? Afo nte eyịghe mîdụhe ukopke n̄kpaidem ndifiọk nte ke ekọn̄ oro akade-ka iso ke osụk an̄wana, nte ke afai afai ubiatibet ke aka iso atara, m̀mê nte ke akan̄ ke aka iso osụhọde ukeme idụt oro ọtọn̄ọde-tọn̄ọ ndinyene uforo.
Edieke afo mûdụn̄ke ke ebiet oro mme n̄kpọ ẹmi ẹsitịbede, ekeme ndidi mme utọ ntọt oro isinamke fi okop ebeubọk mfụhọ kpukpru ini. Kamse, anie mîkpokopke mbọm iban̄a ofụri otuowo ẹmi ẹkụtde ndutụhọ mi? Kpa ye oro, ọsọsọn̄ ndimụm idem n̄kama ke ini nnyịn ikụtde usụn̄ oro ndutụhọ otụkde mme owo. Ke nditịn̄ ke usụn̄ efen, ke adan̄aemi edide n̄kpọ kiet ndikot mban̄a ekọn̄ nnyụn̄ n̄kere mban̄a ibatowo oro ẹkpan̄ade, edi ata isio isio n̄kpọ ndikot mban̄a ekpri Adnan, eyeneren Bosnia edide isua usụkkiet ke emana emi eka esie akakpade ke ini bọmb okowụride ufọk mmọ. Ọfiọn̄ ifan̄ kpọt ke oro ebede owo ama edịbe otop ete Adnan owot nte mmọ ẹkesan̄ade ọtọkiet ke efak. Urua ifan̄ kpọt ke oro ebede enye ama okụt nte iyịp ọwọrọde eyeneka esie an̄wan tutu akpa, nte owo unọmọ emi ọtọmbe okobomode ọtọ ke an̄wa ufọkn̄wed. Mme dọkta ẹmi ẹkenọde Adnan usọbọ mfịghe eke ntụk ẹma ẹkụt ẹte ke ntụk eyeneren emi ama odoro ibikpai, inyeneke baba ntụk kiet—idem ndinyene udọn̄ mban̄a mme n̄kpọ. Ndịk ye mme n̄kpọ oro enye ekesitide ẹma ẹsitịmede enye ekikere ke ini enye mîdehe idap; ndiọi ndap ẹma ẹnam enye inyeneke nduọkodudu ke idap esie. Adnan idịghe owo oro ẹkerede-kere. Enye edi eyen emi okụtde ndutụhọ; nnyịn ikemeke nditre ndikop mbọm mban̄a enye.
Ntre n̄ko ke edi ye mme idiọk idaha eken ke ererimbot. Edi n̄kpọ kiet ndikokot mban̄a akan̄; edi ata isio isio n̄kpọ ndikụt ndise eyenan̄wan isua ition emi idịbi ofụtde ukot onyụn̄ ebietde ọkpọayan̄, owo unọmọ ọbiọn̄ emi mîsiwakke ndidu uwem. Edi n̄kpọ kiet ndikot mban̄a ibat ubiatibet; edi ata isio isio n̄kpọ ndikop mban̄a akanian̄wan ebeakpa emi ẹmiade idiọk idiọk, ẹwode, ẹnyụn̄ ẹdan̄de ke n̄kanubọk. Edi n̄kpọ kiet ndikot mban̄a n̄wụre ubon; edi ata isio isio n̄kpọ ndikop nte ke eka okokoi enịm eyen esie biọn̄ onyụn̄ akama enye ke ata idiọk usụn̄.
Edi ubiak ubiak n̄kpọ ndikot mban̄a mme utọ n̄kpọ oro. Edi ọdiọk adan̄a didie ntem ke ini kiet ke otu nnama ofụri ererimbot ẹmi otụkde nnyịn nnennen! Ke ini afo okụtde ndutụhọ ke idemfo, n̄kponn̄kan idaha ndise oro mbụk n̄kpọntịbe ererimbot owụtde ekeme ndikabade ndi enyene-ndịk n̄kpọ. Edi n̄kpọ oyomonsia ndifiọk akpanikọ oro nte ke ndutụhọ otode ubiatibet, ekọn̄, akan̄, ye udọn̄ọ ke ọkọri ke udomo oro akanam mîtịbeke ke mbụk owo. Mme utịp eke ediyọ mme n̄kpọntịbe eke isua ikie 20 emi ẹkeme ndinen̄ede n̄kpon—ndutịme, ndịk, ye mfụhọ ẹdi ọsọ n̄kpọ.
Mme owo eke nsio nsio ido ukpono ke ẹyom ibọrọ ẹnọ mme utọ etịmerede-owo-esịt mbụme nte, Ntak emi mme n̄kpọ ẹdiọkde ntem-e? Ubonowo aka m̀mọ̀n̄?
Ke mfụhọ, mme ido ukpono mfịn iwakke ndinọ mme ibọrọ oro ẹnọde uyụhọ. Ke ini afo ke akpa okokụtde mbụme odude ke ikpaedem magazine emi, ekeme ndidi afo ama enyene eyịghe—kpa edinam oro an̄wan̄ade. Ido ukpono ẹmi ẹsọn̄ọde ẹyịre ke akpan ukpepn̄kpọ ẹsiwak ndidomo nditịn̄ se mîkam isịneke ke Bible—nnennen usen oro ẹdisobode ererimbot emi ẹfep. (Se Matthew 24:36.) Mme andimịn̄ n̄wedmbụk emi ẹma ndiyak Bible anam se enye etịn̄de an̄wan̄a. Afo emekeme ndidu ke n̄kpaidem ndifiọk nte ke se Bible etịn̄de aban̄a ukperedem ini edi akpanikọ onyụn̄ owụt ifiọk. Ndien ikụreke ke Bible ndinam an̄wan̄a ntak emi mme n̄kpọ ẹdiọkde ntem. Enye n̄ko ọnọ idotenyịn aban̄a ini iso, kiet emi enen̄erede ọnọ ndọn̄esịt. Nnyịn imesịn udọn̄ inọ fi ndikot mme ibuotikọ ẹtienede mi man okụt nte emi edide ntre.
[Ebiet Ẹdade Ndise Ẹto ke page 2]
Ikpaedem ye page 32: AFP/Corbis-Bettmann
[Ebiet Ẹdade Ndise Ẹto ke page 3]
Jobard/Sipa Press