Ndibiat Mme Nsunsu Edori Ikọ ke France

MME NTIENSE JEHOVAH ke France ẹkedi mbon oro ẹketịn̄de akpakịp nsunsu edori ikọ ẹdian ke ndondo emi. Ke anamde n̄kpọ aban̄a mme n̄kpọntịbe mmọn̄eyet ẹmi ẹkebuanade mme n̄ka ido ukpono ke Europe ye Japan, ndutịm usuanetop ama asuan ukwan̄ etop aban̄a Mme Ntiense. Ẹketịn̄ ẹban̄a mmọ ke ukwan̄ usụn̄ nte kiet ke otu n̄kponn̄kan ye ndedịbe n̄ka oro enyenede ndịk akan.

Ke ukeme ndinen̄ede mme n̄kpọ, Mme Ntiense Jehovah ẹma ẹmịn̄ tract kiet emi ọkọbọrọde mme utọ mbụme nte mmọemi: Mmanie ẹdi Mme Ntiense Jehovah? Nte mmọ ẹdi mme Christian? Nte mmọ ẹsibọ ibọkusọbọ? Ntak emi mmọ ẹsisan̄ade ke enyịnusụn̄ ke enyịnusụn̄? Didie ke ẹse ẹban̄a utom mmọ ke n̄kan̄ okụk? Didie ke Mme Ntiense Jehovah ẹnọ obio ufọn?

Ẹkekot tract oro ọdọn̄ọde ntọt mi ke usem French Mme Ntiense Jehovah—Se Oyomde Afo Ọdiọn̄ọ. Man ẹyak tract emi ẹnọ adan̄a ediwak owo nte ẹkekeme, ẹma ẹdiomi ubịnikọt. Ọtọn̄ọde ke May 13 tutu esịm June 9, 1996, ẹma ẹsuan se iwakde ikan idem miliọn usụkkiet.

Tract emi ama otụk ediwak owo, esịnede ikpọ owo ukara. “Edori ikọ oro ẹkedoride Mme Ntiense Jehovah mi ama ayat mi esịt etieti,” ntre ke kan̄selọ ikpehe obio kiet eketịn̄ ke ama okokot tract oro. “Ediwak ini mmesiwụt esịtekọm mban̄a edu ntatubọk ye unana ibụk utom mbufo.” Ke nditịn̄ n̄kpọ mban̄a tract oro, owo Ufọkmbet Mbon Europe ekewet ete: “Ata ediwak owo ẹnen̄ede ẹdiọn̄ọ ukpụhọde oro odude ke ufọt otu mme Christian emi mbufo ẹdide ubak ye mme ndedịbe n̄ka.”

Ke Brittany Ntiense kiet ama ayak tract oro ọnọ oku kiet, emi ọkọbọde enye ye unana ubiatini. “Mmotoro mbufo ke se mbufo ẹnamde,” ntre ke oku oro eketịn̄. Enye ama adian do ete: “Nsịn udọn̄ nnọ mbon ufọkabasi mi nte ẹsiyak mbufo ẹdụk ufọk mmọ ẹnyụn̄ ẹsinọ mbufo kọp kọfi kiet. Afo amakam ekeme ndidọhọ mbon oro afo osobode ete ke imọ ima iwaha ufọk mi. Ami n̄ko nyom ndisian fi nte ke mmesima ndikot mme n̄wed mbufo.”

Ke ama ọkọbọ tract oro, eren Protestant kiet ke Alsace ama ọnọ n̄wed ẹsọk Watch Tower Society oyom ukpepn̄kpọ Bible. “Ke mma n̄kọduọk ofụri mbuọtidem mban̄a ufọkabasi mi,” ntre ke enye ekewet, “ami nsak iso nse obufa ntọn̄ọ ke n̄kan̄ eke spirit.” Kpa ye mme nsunsu edori ikọ ẹmi ẹsidoride mmọ ndusụk ini, Mme Ntiense Jehovah ke France—ke akpanikọ, ke ofụri ikpehe ererimbot—ke ẹka iso ndin̄wam mme owo ndinyene nnennen ifiọk aban̄ade mme uduak Abasi, nte ẹwụtde ke Bible.—2 Timothy 3:16, 17.