Mbuọtidem ke Abasi—Ndi Okpoyom Utịben̄kpọ?

ALBERT okodu ke ntọn̄ọ ntọn̄ọ iduọkisua 20 ke ini ọkọtọn̄ọde ndiyom Abasi. Enye ama odomo ediwak ido ukpono ese edi ikopke uyụhọ. Ke okotde mme ikpehe Bible, enye ama ekpep nte Abasi akanamde n̄kpọ ye mme utọ owo nte Noah, Abraham, Sarah, ye Moses. Albert ama okụt idemesie nte asan̄ade ekpere Abasi a-Bible. Ndi enye, nte ededi, ama ekeme ndinịm ke Abasi enen̄ede odu?

Mbubịteyo usen kiet Albert ama awat aka nsannsan ebiet kiet ke ebiet enye ọkọbọn̄de akam ete, “Abasi mbọk, nọ mi idiọn̄ọ—n̄kpọ ekededi ndiwụt nte ke afo omodu.” Albert ama aka iso ndibet. Enye eti ete ke ini n̄kpọ ndomokiet mîketịbeke, idotenyịn imọ “akakabade edi edikpu, ukpọk, iyatesịt.”

Ukem nte Albert, ediwak owo ẹkere ke mmimọ ikoyom Abasi ke ikpîkpu. Eyedi ukwọrọikọ mme ọkwọrọ ederi ẹtịmerede mmọ m̀mê ẹkop mfụhọ ẹban̄a usọ unyamurua eke mme ọkwọrọikọ ekebe ndise. Ke edide se mbubịk ido emi ẹkụtde ke otu mbọhọidụn̄ mmọ ẹtụkde, ndusụk owo ifiọkke se ẹkpenịmde ke akpanikọ. Edi, Edidem David eke Israel eset ama ọsọn̄ọ etịn̄ ọnọ Solomon eyen esie ete: “Afo ama oyom [Abasi], oyokụt enye.”—1 Chronicles 28:9.

Ọfọn, ndien, didie ke Abasi ayarade idemesie? Nte afo ekpenyene ndiyom idiọn̄ọ—kpa ndusụk ifiọk n̄kpọntibe oro akande ukeme owo oro ediwụtde fi ke Abasi odu? Nte ekemde ye ndụn̄ọde ndondo emi ẹtọtde ke magazine Time, se ibede mbahade mbon America iba ke itie ita ẹnịm mme utịben̄kpọ ke akpanikọ. Ibuotikọ oro ama ọdọhọ n̄ko ete ke “mme ufọkabasi ẹmi ẹsọpde ndinyene n̄kọri ẹkan ke America ẹdi mme esop Charismatic ye Pentecostal emi utuakibuot esikọn̄ọde ke ‘mme idiọn̄ọ ye mme utịben̄kpọ.’”

Nte ekpenen̄ede oyom “mme idiọn̄ọ ye mme utịben̄kpọ” man ẹnịm Abasi ke akpanikọ? Enye ama esida mme utịben̄kpọ ke ini edem. Ke ndinam an̄wan̄a: Saul eke Tarsus, emi ọkọkọbọde mme anditiene Eyen Abasi, Jesus Christ, ama enyene n̄wọrọnda ifiọk n̄kpọntịbe ke usụn̄ otode ke Jerusalem osụhọde ke Damascus. Utịbe utịbe edisobo emi Saul okosobode ye Jesus emi ẹma ẹkenam eset ke n̄kpa ama ada esịm enye ndikabade esịt. (Utom 9:1-22) Ntem akani andikọbọ ama akabade edi apostle Paul—kiet ke otu mme akpa owo ẹmi ẹkedade ẹnọ Ido Ukpono Christ!

Edi nte mme utịben̄kpọ ẹsinyene utọ nti utịp oro kpukpru ini? Nte ata mbuọtidem ke Abasi ọkọn̄ọ ke owo ndinyene ndusụk utịbe utịbe ifiọk n̄kpọntịbe?

[Ndise ke page 3]

Eyen Abasi ama etịn̄ ikọ ke utịbe utịbe usụn̄ ọnọ Saul eke Tarsus. Nte afo ekpenyene ndidori enyịn utịben̄kpọ ndida itie?