Ntọt M’ọkwọrọ Obio Ubọn̄

“Yak Un̄wana Mbufo Ayama ke Iso Owo”

KE UKWỌRỌIKỌ esie oro ke Obot, Jesus ama ọdọhọ mme mbet esie ete: “Mbufo ẹdi un̄wana ererimbot.” Enye ama aka iso akpak mmọ ete: “Yak un̄wana mbufo ayama ke iso owo, man mmọ ẹkụt nti utom mbufo, ẹnyụn̄ ẹtoro Ete mbufo emi odude ke heaven.”—Matthew 5:14-16.

Ke Italy nti utom Mme Ntiense Jehovah idịbeke. Ke uwụtn̄kpọ, eti eduuwem mmọ ke ini ẹdụkde mme mbono mmọ eke isua ke isua esida itoro ọsọk Abasi, nte ntọt oro ẹtienede mi ẹsọn̄ọde:

▪ Ke ediwak isua n̄wan kiet ke Terni, Italy, ama an̄wam eyen esie an̄wan ndise mban̄a itie unyamudia oro okodude ekpere an̄wambre ke obio oro. Enye obụk ete: “Mma n̄kụt akwa ukpụhọde ke ufọt mbon oro ẹkedide ndise mbre bọl ye mme andidụk mme mbono Mme Ntiense Jehovah do. Mme Ntiense ẹma ẹsịne ọfọn̄ oro ẹtịmde ẹdot, ndien mmọ ẹma ẹnam akpanikọ ẹnyụn̄ ẹwụt ukpono. Mma nsiwak ndibụp idemmi nte mme owo ẹmi ẹtode nsio nsio orụk ẹkpekemede nditie ufan ufan ntre.

“Usen kiet Ntiense kiet ama okot mi ke efak onyụn̄ obụp m̀mê mmọfiọk enyịn̄ Abasi. Ami n̄kọfiọkke, ndien sia n̄kọfiọkde nte ke Mme Ntiense Jehovah ẹdi nti owo, mma nnyịme enye edi edem mi. Mma nnyene mbụme ẹban̄ade idaha mme akpan̄kpa, emi enye akakamade Bible ọbọrọ. Ye unana mmen̄e, mma nnyịme ukpepn̄kpọ Bible, ndien ke urua iba ẹbede mma ntọn̄ọ ndidụk mme mbonoesop.

“Ke akpa eyen mi an̄wan ama ọbiọn̄ọ mi, edi eduuwem ye ubiere mi ẹma ẹkpụhọde edu esie. N̄kọtọn̄ọ ndikpep n̄kpọ ke ọfiọn̄ usụkkiet ẹmi ẹkebede. Mfịn eyen mi ye ebe esie ẹsitịn̄ nti ikọ ẹban̄a Mme Ntiense ẹmi ẹsidide ẹdidep n̄kpọ ke itie unyamudia mmọ. Amaedi ami, mma nna baptism ke mbono kiet ke an̄wambre emi.”

▪ Ke mbono kiet ke Roseto degli Abruzzi ama okokụre, esenyịn itienna kiet ama ọdọhọ ete: “Mmokụt nte ke Mme Ntiense Jehovah ẹdi ata mbon akpanikọ ke kpukpru se mmọ ẹnamde. Urua oko, mma nnyene owo 40 ke otu mmọ ke itienna mi, ndien mmọ ikọnọhọ mi mfịna ndomokiet. Ke edide isio, mmọ ẹdi n̄kukụre mbon oro ẹdide ẹdisian fi edieke mmọ ẹnyenede owo efen emi etienede odu ke ufọkisan̄ m̀mê itienna mmọ. Adan̄a nte mfiọkde, mmọ ẹdi mfọnn̄kan mbonurua oro afo ekemede ndinyene.”

▪ Ke mbono oro ama okokụre, etubom ufọkisen kiet ama ọdọhọ ete: “Kpukpru Mme Ntiense Jehovah ẹtie emem emem. Mmọ itiehe uyom uyom, ndien mmọ ẹsibak ẹdụk idap. Mmọ ẹnen̄ede ẹfọn ido, ẹnam akpanikọ, ẹnyụn̄ ẹdu eti uwem. Ekpedi utịben̄kpọ edieke kpukpru owo ẹkpetiede nte mmọ. Mbon eken ẹsiyịp kpukpru n̄kpọ—mme omụk, akwa ntọn̄, idem babru uka ikọt ye sugar! Akananam n̄kpọ ntem itịbeke ye mbufo. Ke ini nditọ mbufo ẹsiode ice cream ke ekebe ntụhube ke mbubịteyo, nsifịnake idem ndika n̄kese m̀mê nso ke mmọ ẹsio. Mmọ ẹsidian ibat okụk oro mmọ ẹkamade mi ẹnyụn̄ ẹdi ẹdikpe ye unana ubiatini. Mmenyene ọyọhọ mbuọtidem ke idem mmọ. Ekpedi utịben̄kpọ didie ntem edieke mbon efen ẹkpetiede ntem! Ọdọn̄ mi kpukpru isenowo mi ndidi Mme Ntiense Jehovah.”

Ẹtịm ẹdiọn̄ọ Mme Ntiense Jehovah ke Italy, kpa nte edide ke ediwak ikpehe efen ke isọn̄. Mmọ ‘ẹkama idem nte odotde ke otu mme idụt’ ndien ke ntem ẹda itoro ẹsọk Abasi akpanikọ, emi mmọ ẹkerede enyịn̄ esie.—1 Peter 2:12.