Edikan Emi Mme Ntiense Jehovah Ẹfiakde Ẹnyene ke Greece
KE October 6, 1995, Esop Ayaraiwat ke Athens emi esịnede ayaraiwat ita ama ekpe ikpe emi akabuanade owo iba ẹmi ẹkedide mme asan̄autom uyọhọ ini eke Mme Ntiense Jehovah. Edori ikọ akaban̄a edikwọrọ ikọ n̄kabade owo esịt, ndien edi owo bodisi ekesịn ikpe oro ke esop ke Mme Ntiense ẹma ẹkewaha ufọk esie.
Mme mbụme oro ebiereikpe oro etiede ibuot okobụpde ama owụt ete ke enye ama enen̄ede enyene udọn̄ ke utom Mme Ntiense Jehovah. Ke uwụtn̄kpọ, enye ama obụp ete: “Mbufo ẹnam utom emi ebịghi adan̄a didie? Didie ke mme owo ẹsinam n̄kpọ ye mbufo ke mme isua ẹmi ẹbede? Didie ke mme owo ẹsinam n̄kpọ ẹban̄a utom mbufo? Nso ke mbufo ẹsitịn̄ ẹnọ mme owo ke enyịnusụn̄ mmọ?” Kpukpru mbon oro ẹkedude ke ufọkesop ẹma ẹkpan̄ utọn̄ ntotụn̄ọ ntotụn̄ọ ẹnọ eti ikọ ntiense oro ẹkenọde.
Ke akwa n̄kpaidem Mme Ntiense oro, idem okot-ikpe eketịn̄ ikọ ke ufọn mmọ. Enye ọkọdọhọ ke akpatre ikọ esie ete: “Mme Ntiense Jehovah ẹnyene unen oro ekemde ye n̄wedibet idịghe ke ndinịm ke akpanikọ nnyụn̄ ntuak ibuot nnọ Abasi mmọ kpọt, edi n̄ko ndisuan se mmọ ẹnịmde ke akpanikọ ke enyịnusụn̄ ke enyịnusụn̄, ke an̄wa obio, ye ke mme efak, idem ẹsuande mme n̄wed mmọ ke mfọn edieke mmọ ẹyomde.” Okot-ikpe oro ama ọnọ uwụtn̄kpọ aban̄a nsio nsio ubiere utebeikpe oro mme esopikpe ye Esop Idụt ẹkenọde. Enye n̄ko ama etịn̄ otụk ikpe Kokkinakis ye Greece, emi Esopikpe Mbon Europe Kaban̄a Unen Owoa ekebierede ikpe ke ufọn Mme Ntiense Jehovah. Okot-ikpe oro ama odụri mme owo utọn̄ ete: “Mbọk ẹtịm ẹfiọk ẹte ke Greece ama akam ekpe isop ke ikpe emi. Ntre nnyịn ikpenyene nditịm n̄kpeme ke ini ẹkotde nnyịn ndikpe mme utọ ikpe oro. Ke nditịm ntịn̄, owo ikpenyeneke ndimen mme utọ ikpe ẹmi ndi esop ke akpa ifet.”
Ke etienede utịn̄ikọ okot-ikpe oro, lọya Mme Ntiense oro ikenyeneke ekese ikọ nditịn̄ aba. Kpa ye oro, enye ama ada ifet oro ndisọn̄ọ ntịn̄ nte ke ibet aban̄ade edikwọrọ ikọ n̄kabade owo esịt ikemke ye n̄wedibet ye nte ke enye edi esuene ọnọ Greece ke ofụri ererimbot.
Ebiereikpe oro etiede ibuot n̄kukụre ama otop enyịn ese mme ebiereikpe iba eken, ndien ofụri mmọ ẹma ẹnyịme ye esịt kiet ẹte ẹtebe brọda ye sista oro ikpe. Ikpe oro, emi ekebịghide ke hour kiet ye minit duop, ekedi edikan ọnọ enyịn̄ Jehovah ye ikọt esie.
Emi ekedi ọyọhọ utebeikpe inan̄ ke ikpe ẹbuanade edikwọrọ ikọ n̄kabade owo esịt ke ẹma ẹkekpe ikpe Kokkinakis ẹma ke Esopikpe Mbon Europe Kaban̄a Unen Owo. Mme Ntiense Jehovah ke Greece ẹkop idatesịt nte ke ekpere ndidi mme mfịna oro ẹnyenede ye ukwọrọikọ mmọ idụhe aba idahaemi ye nte ke ẹkeme ndika iso ke utom emi ye unana ubiọn̄ọ.
[Mme Ikọ idakisọn̄]