Ntọt M’ọkwọrọ Obio Ubọn̄

Ndida Akpanikọ Nsịm Kpukpru Orụk Owo

APOSTLE Paul ekedi ifịk ifịk anditan̄a Obio Ubọn̄ Abasi. Enye ikayakke ubiọn̄ọ etịmede utom esie ndikwọrọ “gospel.” (1 Corinth 9:16; Utom 13:50-52) Paul ama akpak mbon en̄wen nditiene uwụtn̄kpọ esie.—1 Corinth 11:1.

Ẹdiọn̄ọ Mme Ntiense Jehovah ke ofụri ererimbot kaban̄a ubiere mmọ ndisịn ukeme n̄kwọrọ ikọ. Ke akpanikọ, mmọ ẹsitịn̄ ikọ ẹnọ mbon en̄wen ke “edide ekem ini” ye ke “mînyụn̄ idịghe ekem ini” man ẹyọhọ utom ‘edinam mbet’ emi Abasi ọnọde mmọ. (2 Timothy 4:2; Matthew 28:19, 20) Idem ke mme idụt oro mmọ ẹsobode ubiọn̄ọ, ẹsida ata akpan etop oro aban̄ade Obio Ubọn̄ Abasi mi ẹsọk mbon oro ẹnyenede esịt akpanikọ, nte mme ifiọkutom ẹtienede mi ẹwụtde.

◻ Ke isuo kiet ke n̄kan̄ edem usoputịn Pacific emi utom Mme Ntiense Jehovah odude ke idak ukpan, eyeneren isua 12 ama okụt ete ke ndiọi nsan̄a ẹkakan imọ ẹkụk ke ufọkn̄wed. Ediwak ke otu nditọ ubet ukpepn̄kpọ esie ẹma ẹsin̄wọn̄ sika kpukpru ini, ẹkot n̄wedndise idan̄, ẹfịna mme andikpep, ẹnyụn̄ ẹn̄wana en̄wan. Idaha oro ama etịm ọdiọk tutu eyeneren oro obụp ete esie m̀mê imọ imekeme ndiwọrọ n̄ka ufọkn̄wed efen. Ete oro, nte ededi, ama ọkọk ibuot ye eyeneren esie ndikpụhọ utọ ekikere oro, sia enye ekekerede ete ke ekeme ndidi eduuwem nditọ ufọkn̄wed ke mme ufọkn̄wed eken idinyeneke ukpụhọde. Edi, didie ke enye edin̄wam eyen esie?

Ete ama eti ete ke imenyene n̄wed ẹwetde ẹnọ mme uyen ke ufọk. Enye ekedi enọ otode iman oro edide kiet ke otu Mme Ntiense Jehovah. Ntre enye ama oyom n̄wed oro, ndien ke ini okokụtde enye, enye ama ayak enye ọnọ eyen esie. Enyịn̄ esie ekedi Questions Young People Ask—Answers That Work.a Eyeneren emi ama okụt nte ibuot oro “How Can I Cope With Peer Pressure?” (Didie ke N̄keme Ndiyọ Mfịghe Otode Ubọkn̄ka?) enen̄erede edi n̄kpọ un̄wam. Emi ikekpepke enye ufọn edikama idem ukpono ukpono kpọt edi n̄ko ama ekpep enye nte ekemede ndidọhọ baba ye usọ ke ini mbon en̄wen ẹdomode ndinyịk enye nsịn ke usụn̄ edinam oro mîwụtke ọniọn̄. Ebede ke ndida mme edumbet N̄wed Abasi ẹdude ke n̄wed emi nsịn ke edinam, akparawa emi ama ekpep nte ekemede ndikụt unen ke ndiyọ mfịghe otode ubọkn̄ka.

Ke okụtde emi ye nti ukpụhọde eken ke uwem eyen esie, ete ama ebiere ndikot n̄wed oro. Ke okopde inemesịt aban̄a nti item oro okokụtde ke n̄wed oro, ete ama eben̄e Mme Ntiense Jehovah ẹdinịm ukpepn̄kpọ Bible ye imọ. Ekem, mbon eken ke ubon esie ẹma ẹtiene enye ẹkpep n̄kpọ. Nso ikedi utịp? Eyeneren oro, ekpri eyeneka esie eren, ete esie, iba ke otu mme eteete ye eteeka eyeneren oro ẹdi Mme Ntiense Jehovah idahaemi.

◻ Kpa ke idụt oro, ẹma ẹsịn owo iba ke otu Mme Ntiense Jehovah ke ufọk-n̄kpọkọbi ke ntak mmọ ndisọn̄ọ nyịre ye mme edumbet Bible. Nte ededi, mmọ ikayakke idaha mmọ akpan mmọ nditịn̄ ikọ uko uko mban̄a Obio Ubọn̄ Abasi. Mmọ ẹma ẹsobo ye akwa owo ufọk-n̄kpọkọbi ẹnyụn̄ ẹbọ unyịme ndinịm Udia Mbubịteyo Ọbọn̄ do. Mmọ ẹkekop inemesịt didie ntem ke ini mbon n̄kpọkọbi 14 ẹkewụtde udọn̄ ke Bible ẹnyụn̄ ẹdianade ye Mme Ntiense ke akpan edinam emi! Ke ini ẹsion̄ode mmọ, ndusụk mmọ ẹma ẹka iso ndikpep Bible ẹnyụn̄ ẹbuana ye Mme Ntiense Jehovah.

Ke se iwakde ikan idụt 25, Mme Ntiense Jehovah ẹbọ ndutụhọ ke ntak ukpan m̀mê nsio nsio orụk ubiọn̄ọ m̀mê ukọbọ. Nte ededi, ukem nte mme apostle, mmọ ẹka iso “idopke uyo ndikpep nnyụn̄ n̄kwọrọ, ẹte Jesus edi Christ.”—Utom 5:42.

[Mme Ikọ idakisọn̄]