Kpukpru Ẹdi Uyarade Ẹtode Abasi?
NTE ekeme ndidi spirit Abasi, emi ọkọnọde odudu ẹwet Edisana Bible, akanam ẹwet mme n̄wed eken n̄ko ẹmi ndusụk owo ẹdade nte ndisana n̄wed? (2 Timothy 3:16) N̄wedmbụk n̄ka Jesuit eke Italy, (La Civiltà Cattolica), emi ẹkemịn̄de “ke idak ndausụn̄ Ọfis Ewetn̄wed Ukara [Obio Ukara pope]” ndien ke ntre ẹdade nte se ẹnyịmede ke otu mbon Catholic, okobụp mbụme emi.
N̄wedmbụk n̄ka Jesuit oro ọkọdọhọ ete: “Abasi, ebede ke edinam Edisana Spirit, ama asuan mfri Ikọ idem ke ndusụk ndisana n̄wed ẹmi mîdịghe eke mme Jew ye eke mme Christian.” Ye mme Jesuit, ẹkewet “ndisana” n̄wed, utọ nte Zoroastrian Avesta m̀mê N̄wed Inan̄ eke Confucius, “ye ndusụk akpan odudu Edisana Spirit, ndien ke ntre, mmọ ke ndusụk udomo ẹdọn̄ọ ‘ediyarade otode Abasi.’”
Nte ededi, ibuotikọ oro anam n̄kpọ an̄wan̄a. Enye ọdọhọ ete: “Idịghe ofụri se idude ke mme utọ ndisana n̄wed oro ẹdi ikọ Abasi,” adiande ete ke ekeme ndidi “n̄kann̄kụk oro ẹkekponode ediwak abasi m̀mê eke ukpepn̄kpọ akwaifiọk” oro mmọ ẹkedude ẹnyụn̄ ẹnamde n̄kpọ ẹma ẹnyene odudu ke idem mbon oro ẹkewetde mme n̄wed ẹmi. Nte Marco Politi, ọkọmbụk Obio Ukara pope nnọ n̄wedmbụk n̄kpọntịbe Italy oro La Repubblica, ọkọdọhọde, ekikere emi “anam ẹkụt mme idaha oro owo mîkekereke ke mbemiso nte ke ẹdu ke itie ebuana Ufọkabasi Catholic ye ikpọ ido ukpono eset,” ẹfiakde ẹnyene edu nsio nsio mboho akam mbuaha mbuọtidem nte enyeoro okodude ke Assisi ke 1986, emi John Paul II ekesịnde udọn̄ ọnọ.
Jehovah idịghe Abasi unana ndutịm ye ndutịme. (1 Corinth 14:33) Ntre nnyịn nte enende ikemeke ndibiere nte ke edisana spirit, m̀mê anamutom odudu esie, ọkpọnọ odudu ẹwet ọkpọkọm ikpehe kiet ke n̄wed ekededi oro mîdụhe ke ọyọhọ n̄kemuyo ye Ikọ esie, kpa Bible. Utu ke ndisịn udọn̄ nnọ usụn̄ oro esop ufọkabasi anamde n̄kpọ ke ufọt nsio nsio “edinam ido ukpono,” Christian apostle Paul ekewet ete ke “idotenyịn kiet . . . , Ọbọn̄ kiet . . . mbuọtidem kiet, ye baptism kiet” odu.—Ephesus 4:4, 5.
“Idotenyịn kiet” oro ọkọn̄ọ ke ndibuọt idem ke Jesus Christ. Bible nte enende ọdọhọ ete: “Edinyan̄a inyụn̄ itoho ke baba owo kiet efen: koro enyịn̄ baba kiet efen inyụn̄ idụhe eke ẹnọde ke otu owo ke idak ikpa-enyọn̄, eke ẹnyenede ndida nnyan̄a nnyịn.” (Utom 4:12) Idụhe “ndisana n̄wed” ndomokiet efen oro owụtde Jesus nte akpan owo ke ndisu mme uduak Abasi. Edi n̄kukụre ke nnyịn inyịmede Bible nte Ikọ Abasi ke enye ekeme ndikpep nnyịn mban̄a ima ima ndutịm Jehovah Abasi kaban̄a edinyan̄a.—John 17:3; 1 Thessalonica 2:13.