Anie Enyene Nduduọhọ Kaban̄a Ekọn̄?

NDI ẹnyene ndiduọhọ Abasi kaban̄a mme ekọn̄ oro ubonowo an̄wanade? “Baba, Abasi iyomke ekọn̄.” Ntre ke Martin Niemöller, ọkwọrọ ederi Protestant edide owo Germany emi ẹtịmde ẹdiọn̄ọ, ọkọbọrọ mbụme emi esisịt ini ke Ekọn̄ Ererimbot II ama okokụre. Ẹkewet utịn̄ikọ esie ke 1946 ke n̄wed oro ẹkotde Ach Gott vom Himmel sieh darein—Sechs Predigten (O Abasi, Tie ke Heaven Se—Ukwọrọikọ Itiokiet).a N̄wed oro ọdọhọ ete:

“Owo ekededi eke oyomde ndiduọhọ Abasi kaban̄a [mme ekọn̄] ifiọkke, mîdịghe iyomke ndifiọk, Ikọ Abasi. Nte ededi, n̄kpọ efen edi m̀mê akam edi mme Christian ẹnyene akamba nduduọhọ kaban̄a mme ekọn̄ m̀mê idịghe. Ndien nnyịn ikemeke ndifep mbụme emi mmemmem mmemmem. . . . Ẹkeme n̄ko nditi etịm ọfọn nte ke mme ufọkabasi Christian, ke ofụri emana, ediwak ini ẹsinọ idemmọ unyịme unyịme ndidiọn̄ mme ekọn̄, udịmekọn̄, ye mme n̄kpọekọn̄ ye nte ke mmọ ẹsibọn̄ akam ke ata ido oro mîbietke eke mme Christian ẹban̄a edisobo mme asua mmọ ke ekọn̄. Kpukpru emi edi ndudue nnyịn ye ndudue mme ete nnyịn, owo inyeneke ndiduọhọ Abasi ke usụn̄ ndomokiet. Ndien nnyịn mme Christian eyomfịn imenyene ubiomikpe ke iso mbon oro ẹkotde n̄ka utọ nte Ifịk Ifịk Nditọ Ukpepn̄kpọ Bible [Mme Ntiense Jehovah], ẹmi ediwak tọsịn ke mme itie ikie ke otu mmọ ẹkedude ke itienna ekikere ẹnyụn̄ [ẹkam] ẹkpade ke ntak emi mmọ ẹkesịnde ndidụk utom ekọn̄ ẹkenyụn̄ ẹsịnde nditop mme owo ke ikan̄.”

Mfịn, n̄kpọ nte isua 50 ke Ekọn̄ Ererimbot II ama okokụre, mme ikọ Niemöller ẹnọ mme owo oro ẹmade emem n̄kpọ ndikere mban̄a. Baba, owo inyeneke ndiduọhọ Abasi kaban̄a uduọkiyịp eke mme idụt! Ke akpanikọ, ebede ke mme ata andituak ibuot nnọ enye, ẹmi mîtieneke ibuana ke mme ekọn̄ ererimbot, Abasi ke atan̄a nte ke utịt ekpere ọnọ kpukpru ekọn̄.—Psalm 46:9; John 17:16.

[Ikọ idakisọn̄]

[Ebiet Ẹdade Ndise Ẹto ke page 32]

USAF photo