Nte Afo Emeti?
Nte afo amadara ndikot mme nsiondi Enyọn̄-Ukpeme ndondo emi? Ke edide ntre, afo oyokụt nte edide inem n̄kpọ nditi se itienede emi:
◻ Nso ke ikọ Greek oro pa·rou·siʹa emi ẹdade ẹtịn̄ ikọ ke Matthew 24:3, 27, 37, 39 ọwọrọ?
Expository Dictionary of New Testament Words eke Vine ọdọhọ ete: “PAROUSIA . . . owụt edidi ndibehe ye edika iso ndu.” Ntem, enye idịghe sụk ndondo oro ẹdide ẹdibehe, edi edidu oro atarade ọtọn̄ọde ke ini edidi ndibehe oro ka iso.—8/15, page 11.
◻ Didie ke ‘ẹkesịbe mme usen oro ẹmụhọ’ man mme “owo” ẹbọhọ ke akpa isua ikie, ndien ke didie ke enye editịbe ke n̄kponn̄kan udomo? (Matthew 24:22)
Ke 66 E.N., mbon Rome ke unana idotenyịn ẹma ẹnam en̄wan oro mmọ ẹkedade ẹdụk Jerusalem edi ibio ibio, anamde mme “owo” oro ẹkedide mme Christian ẹkeme ndifen̄e. Ukem ntre, nnyịn imodori enyịn nte ke usụn̄ ekededi ẹyenam en̄wan oro ẹdidade ẹtiene Akwa Babylon edi ibio ibio. Ntem ẹyenyan̄a mme Christian oro ẹyetde aran ye nsan̄a mmọ ẹbọhọ ndidi se ẹsobode.—8/15, page 18-20.
◻ Didie ke nnyịn ikpanam n̄kpọ edieke owo ọtọn̄ọde ndidia n̄kpọ idiọn̄ọ Editi m̀mê ẹtrede ndidia?
Ufọn idụhe mme Christian eken ndifịna idem. Jesus ọkọdọhọ ete: “Ami ndi eti ekpeme-erọn̄; mmọfiọk se inyenede Mi.” Kpa nte ẹnọde nsọn̄ọ, Jehovah ọfiọk mbon oro enye enen̄erede emek nte nditọ eke spirit. (John 10:14; Rome 8:16, 17)—8/15, page 31.
◻ Nso ikedi akpan uduak Ibet Moses?
Ke ofụri ofụri, enye ama ekpep nditọ Israel aban̄a ediyom oro mmọ ẹkeyomde Messiah, emi edifakde mmọ osio ke idaha idiọkn̄kpọ mmọ. (Galatia 3:24) Ibet oro n̄ko ama ekpep uten̄e Abasi ye n̄kopitem, ndien enye ama an̄wam Israel ndida san̄asan̄a n̄kpọn̄ mme oburobụt edinam eke mme idụt oro ẹkekande ẹkụk. (Leviticus 18:24, 25)—9/1, page 9.
◻ Nso idi uduak obufa ediomi? (Jeremiah 31:31-34)
Edi ndisio idụt ndidem ye mme oku oro ẹdidiọn̄de ubonowo ndi. (Exodus 19:6; 1 Peter 2:9; Ediyarade 5:10)—9/1, page 14, 15.
◻ Ntak emi nnyịn ikpenyenede edu edikpe ubọk-ọ?
N̄kpeubọk ekeme ndin̄wam ndikọk ubiak oro unana mfọnmma ọnọde, ndien enye ekeme ndinen̄ede mme itie ebuana oro ẹdude ke mfịna. N̄kpeubọk kiet kiet oro nnyịn inamde edi ukpepn̄kpọ nsụhọdeidem onyụn̄ ekpep nnyịn ndisitịm n̄kere mban̄a ntụk mbon en̄wen.—9/15, page 24.
◻ Nte Ukwọ ofụri ererimbot eke eyo Noah edi mbụk akpanikọ?
Ih. Ẹkeme ndikụt mme mbụk eset ẹtịn̄de n̄kpọ ẹban̄a ukwọ ofụri ererimbot ke ofụri ererimbot, ọtọn̄ọde ke akamba ubak isọn̄ America tutu esịm Australia. Ibuot nneme emi nditara nsuana adian nsọn̄ọ ke akpanikọ oro nte ke Ukwọ ofụri ererimbot ama etịbe, nte ẹbụkde ke Bible. (Genesis 7:11-20)—9/15, page 25.
◻ Nso ibuana ke ndikama isenowo? (Rome 12:13)
Ẹkabade “ndikama isen owo” ẹto ikọ Greek emi otode mme orụn̄ ikọ iba ẹwọrọde “ima” ye “esenowo.” Ntem, ndikama isenowo enen̄ede ọwọrọ “ndima isenowo.” Edi enye esịne n̄kpọ akan ediwụt ima oro ọkọn̄ọde ke edumbet, emi ẹwụtde nte n̄kpọ oro anade ẹnam. Enye ọkọn̄ọ ke ataata uma, ima, ye itie ufan.—10/1, page 9.
◻ Nso idi nneme Paul kaban̄a ndọ ye itie unana ndọ ke akpa leta oro enye ekewetde ọnọ mbon Corinth, ibuot 7?
Ndọ edi n̄kpọ oro enende, ndien ke ndusụk idaha, ẹtoro enye ẹnọ ndusụk owo. Edi itie unana ndọ nte mfan̄a mîdụhe enyene ufọn ọnọ Christian eren m̀mê n̄wan oro oyomde ndinam n̄kpọ Jehovah ye esisịt mfịna.—10/15, page 13.
◻ Didie ke ebiowo ‘etịm n̄kpọ ọnọ mbon ufọk esie’? (1 Timothy 5:8)
Ebiowo ekpenyene ‘nditịm n̄kpọ nnọ orụk esie’—n̄wan esie ọkọrọ ye nditọ esie—ke n̄kan̄ obụkidem, eke spirit, ye eke ntụk.—10/15, page 22.
◻ Didie ke Jehovah ọnọ mme asan̄autom esie ndọn̄esịt?
Edisana spirit Abasi anam n̄kpọ nte “ọnọ-ndọn̄esịt.” (John 14:16, ikọ idakisọn̄ NW) Usụn̄ efen emi Abasi ọnọde ndọn̄esịt edi ke Bible. (Rome 15:4) Abasi ọfiọk se nnyịn owo kiet kiet iyomde onyụn̄ ekeme ndida nnyịn nnọ kiet eken ndọn̄esịt, nte Paul ọkọbọde ndọn̄esịt ebe ke ntọt oro Titus ọkọnọde aban̄a mbon Corinth. (2 Corinth 7:11-13)—11/1, page 10, 12.
◻ Nso ke ikọ oro Paul etịn̄de aban̄a Jehovah nte “Ete mbọm,” emi ẹkụtde ke 2 Corinth 1:3, ọwọrọ?
Ikọenyịn̄ usem Greek oro ẹkabarede “mbọm” oto ikọ oro ẹdade nditịn̄ mban̄a mfụhọ emi owo okopde aban̄a ndutụhọ owo efen. Ntem Paul etịn̄ aban̄a mbọm mbọm edikere mban̄a emi Abasi enyenede aban̄a kpukpru mme anam-akpanikọ asan̄autom Esie ẹmi ẹkụtde ndutụhọ.—11/1, page 13.
◻ Nso ke nditọ Israel nditie utre udia ke Usen Usio-Isop ini kiet ke isua akanam? (Leviticus 16:29-31; 23:27)
Editie utre udia ama anam mbon Israel ẹnen̄ede ẹnyene ifiọk ẹban̄a idaha idiọkn̄kpọ mmọ ye ediyom oro mmọ ẹkeyomde edinyan̄a. Ebede ke enye mmọ ẹma ẹfụhọ ẹban̄a mme idiọkn̄kpọ mmọ ye edikabade esịt ke iso Abasi.—11/15, page 5.
◻ Nso ke item oro ẹnọde mme uyen ẹte: “Nyụn̄ ti Andibot fi” ọwọrọ? (Ecclesiastes 12:1)
N̄wed kiet ọdọhọ ete ke ikọ Hebrew oro ẹkabarede nte “ti” awak nditịn̄ mban̄a “ima oro odude ke ekikere ye edinịm ke akpanikọ oro asan̄ade ye edifiak nti.” Ntre ndinam item emi esịne n̄kpọ akan sụk edinyụn̄ n̄kere mban̄a Jehovah. Enye abuana edinam, ndinam se inemde enye esịt.—12/1, page 16.