“Ntre Ufọkabasi Mbufo Odu Ke M̀mọ̀n̄?”
MME NTIENSE JEHOVAH ke Mozambique ẹdi se ẹsiwakde ndibụp mbụme emi. Ke nditịn̄ akpanikọ, enye ekedi mbụme oro ọsọn̄de ndibọrọ tutu esịm ndondo emi. Emi edi sia Mme Ntiense Jehovah mîkenyeneke unyịme oro ekemde ye ibet ke idụt emi tutu esịm 1991. Ntem, owo ikekemeke ndinyene mme iwụk itie utuakibuot oro ẹkemede ndidiọn̄ọ an̄wan̄wa.
Nte ededi, idaha oro ama okpụhọde ke February 19, 1994. Ke usen oro eyo akayatde nainai do, ẹma ẹyak mme akpa Ufọkmbono Obio Ubọn̄ iba oro akanam ẹbọpde ke Mozambique ẹnọ. Owo 602 ẹkedi edinam ediyak nnọ eke ndiye itie mbonoesop ẹmi ke obio-mbehe Beira, emi odude ke ufọt ufọt mbenesụk Mozambique. Esop ita ẹmi ẹdude ke obio oro ẹdida mmọ ẹnam n̄kpọ.
Ofụri utom oro, ọtọn̄ọde ke edisịn itiat idakisọn̄ tutu esịm edikụre utom edibọp, akada isua kiet ye ọfiọn̄ iba ẹmi ẹnamde ọkpọsọn̄ utom. Ediwak ini mbon unyịmesịt 30 m̀mê ẹwakde ẹkan oro ẹtode mbọhọ Zimbabwe ẹma ẹsidi ẹnyụn̄ ẹdinam utom ke esịt kiet ye Mme Ntiense n̄kann̄kụk. Sia owo mîkekemeke ndinam kpukpru mmọ ẹdụn̄ ke ufọkidụn̄ mme isụn̄utom ke Beira, emi ekedide iwụk ebiet utịm utom, ndusụk owo ẹma ẹdụn̄ ke itienna ẹkpere ufọkidụn̄ oro ke mme utịturua ye ediwak urua ndusụk ini ke ndusụk idaha.
Ufọkmbono Obio Ubọn̄ Esop Massamba ye Munhava odu ke mbenusụn̄ Beira. “Ke usen ọkpọsọn̄ utom kiet, emi utom akasan̄ade ọfọn ndien n̄kọri ọwọrọde ada,” isụn̄utom kiet etịn̄ ete, “nnyịn ima ikụt nte mbabuat n̄kpọntịbe ekekperede nditịbe nte mme awat o-moto ẹmi ẹkewatde ẹbe ẹkewụkde enyịn ẹse Ufọkmbono Obio Ubọn̄ oro, ẹkperede ndifre ke mmimọ iwat moto.” Ediwak owo ẹma ẹtuak ẹda ndise utom oro, ndien se ikenen̄erede itụk mmọ ke idem ekedi ndikụt mme owo ẹtode nsio nsio orụk ẹnamde utom ọtọkiet nte owo kiet.
Ẹma ẹnam ekese n̄kọk ibuot ye ndutịm. Ke mîbietke ediwak utom eken ke ikpehe ererimbot n̄kan̄ emi, emi mme n̄kpọutom ye okụk ẹsikụrede, akananam owo iketreke utom ke mme Ufọkmbono Obio Ubọn̄ oro ke ntak unana n̄kpọutom. Ke idaha kiet, ẹma ẹyom ekpat simen 800, ndien n̄kukụre itie oro ẹkpenyenede mmọ ẹto ikenyeneke nti ekpat ndida ndọn̄ simen. Nditọete ẹma ẹnyene nneme ye ọfis n̄kọk itieutom Watch Tower Society ke ibuot obio oro, Maputo; ẹma ẹnọ ekpat ẹsan̄a ke ubomofụm ẹdi, ẹda ẹka usiakifia, ẹkedọn̄ simen. Utom oro ama aka iso ye unana edituak nda.
Ke idaha efen, ke ini ẹkekọn̄de eto enyọn̄ọkọm, ndori ukwak ama okụre ọkpọn̄ mbonutom. Ke ntak ọkpọsọn̄ unana, ẹketobo ukwak ndida nnam utom oro ke ebiet oyomde usụn̄ ke kilomita 600! Kiet ke otu mbonutom oro ama obụp eren kiet oro akadade ese m̀mê enye ọfiọk ebiet ẹkemede ndikụt ukwak ndida n̄kụre utom oro. Eren oro ama ọbọrọ ete: “Ami mmada mi ke se ibede hour kiet, ndien anaedi enye idịghe ke mbuari. Mmenen̄ede mma utom emi mbufo ẹnamde ye edu utom emi. Mmenyene orụk ukwak emi mbufo ẹyomde, ndien edidi inemesịt mi ndiyak enye nnọ mbufo nte enọ.” Emi ekedi ata ekemini enọ.
Ediwak mme andida nse ẹma ẹyịk m̀mê ewe akwa ufọkutom ubọpn̄kpọ ekese aban̄a utom oro. Nte ededi, mbonutom oro ẹma ẹkop inemesịt ndisian mmọ nte ke mmọemi ẹdi Mme Ntiense Jehovah ẹmi ẹnamde utom mmọ ke unyịmesịt. Nso ikenen̄ede inem mme andida nse? Owo kiet ọkọdọhọ ete: “Mbufo ẹdi mbon ẹmi ẹdianade kiet. Okposụkedi ẹtode nsio nsio orụk, mbufo ẹnam utom ọtọkiet nte nditọete.” Utịp ekedi ediwak owo ndidọhọ ẹnịm ukpepn̄kpọ Bible ye mmimọ. Enye n̄ko ama otụk mme mbonoesop. Ibat mme andisidụk mbonoesop ke Esop Manga ke ẹbaharede ukem ukem, ke uwụtn̄kpọ, awak utịm ikaba akan ibat Mme Ntiense.
Mbufa Ufọkmbono Obio Ubọn̄ ẹnen̄ede ẹdi akwa edidiọn̄ ẹnọ Mme Ntiense n̄kann̄kụk. Ata ediwak owo ke mbemiso ẹkesisop idem ke n̄kani n̄kani ufọk ẹmi ẹfụkde ndak ke ọkọm m̀mê ẹkọn̄de ibat ibat tian ke ọkọm, ke edemesa ufọk owo, m̀mê ke ekpri ubet kiet ke ufọk owo. Ọfọn̄ mmọ ẹma ẹsibịt ke ini edịm edepde; kpa ye oro mmọ ẹma ẹsidụk mme mbonoesop ifịk ifịk. Ke ediwak isua ẹmi ẹkedi n̄kukụre “Ufọkmbono Obio Ubọn̄” oro Mme Ntiense ke Mozambique ẹkediọn̄ọde. Brọda Caetano Gabriel, ebiowo ke Esop Massamba, etịn̄ ete: “Nnyịn imowụt esịtekọm inọ nditọete nnyịn ke ofụri ererimbot ẹmi ẹketịpde n̄kpọ ndida nnam utom emi mma.” Akparawa Ntiense kiet eti ete: “Ke ini nnyịn ikodude ke Carico (“itienna edifiak nnọ ukpep” emi Mme Ntiense Jehovah ẹkedude ke n̄kọbintem ke n̄kpọ nte isua 12), nnyịn ima isidọhọ ite, ‘Nnyịn iyọyọ ke edinam akpanikọ, ndien Jehovah ọyọnọ nnyịn utịp.’ Obufa Ufọkmbono Obio Ubọn̄ edi utịp emi otode Jehovah.” Mme ikọ mmọ ẹwụt ntotụn̄ọ esịtekọm ye ubiere mmọ nditoro Jehovah.
Edu usiakusụn̄ ama odụk ediwak uyen oro ẹkebuanade ke utom ubọpn̄kpọ oro idem ndien ke oro ebede ẹma ẹdụk utom usiakusụn̄ uyọhọ ini. Ekpri Isabel, asiakusụn̄ uyọhọ ini ke Esop Manga, ama etịn̄ ikọ nte enye ekesede Ufọkmbono Obio Ubọn̄ oro asanade anana ndo ke usen oro ekebemde ediyak nnọ iso ete: “Ye ami emi edi nye-n̄kan itie ke obio Beira. Edi n̄kponn̄kan inemesịt ọnọ mi ndidu mi.” Adão Costa, emi edide isụn̄utom, anam an̄wan̄a ete ke mme akara ukara n̄kann̄kụk ẹma ẹnen̄ede ẹnọ ibetedem ke ndiyak ẹnam mme san̄asan̄a editobo koro mmọ ẹma ẹfiọk ẹban̄a edinam akpanikọ eke Mme Ntiense. Ekem enye adian ete: “Okposụkedi idem ekenen̄erede emem nnyịn, ekedi n̄kpọ idatesịt ndikụt mfri ofụri utom emi ọnọde Jehovah ukpono ye ubọn̄.”
Idahaemi, ini ekededi oro owo emi etiede ufan ufan ke obio Beira obụpde ete, “Ntre ufọkabasi mbufo odu ke m̀mọ̀n̄?” Mme Ntiense ẹyewụt enye kiet ke otu mbufa Ufọkmbono Obio Ubọn̄ iba oro ẹnyụn̄ ẹbọrọ ye mme utọ ikọ nte, “Enye odu ke International Road, Avenida Acordo de Lusaka, ke n̄kan̄ ubọk nnasia ke ini otode Fourth Squadron Police Station odụk.” Ekem, ẹdian edinen̄ede kiet, “Edi enye ikam idịghe ufọkabasi. Enye edi Ufọkmbono Obio Ubọn̄!”
[Ndise obio/Mme ndise ke page 20]
(Ama oyom ndikụt nte enye enen̄erede etie, se n̄wed)
AFRICA
Mozambique
Beira
Maputo
[Ebiet Ẹdade N̄kpọ Ẹto]
N̄wed ndise obio: Mountain High Maps® Copyright © 1995 Digital Wisdom, Inc.