‘Mmọ Ẹnyene Udọn̄ Ke Ndin̄wam Mbon En̄wen’
SE BODISI New York City ọkọdọhọde aban̄a Mme Ntiense Jehovah edi oro. Enye eketịn̄ ikọ ye Kathleen, kiet ke otu mme anamutom unyịmesịt uyọhọ ini emi anamde utom ke ibuot itieutom ofụri ererimbot eke Mme Ntiense Jehovah ke Brooklyn, New York.
Kathleen eketie ke anyan n̄kpọitie ekpere Itie Ubọ-ofụm, ke ini nduọkodudu uwemeyo, ke ufiop ufiop usen ini idọk emi eyo adade. Enye akakpan̄ utọn̄ ọnọ ukwak ubre kaset emi ẹfakde phone utọn̄. Ke ẹkenam ntịmidem ẹnọ pope emi ekedide edise obio oro ndidaha ke an̄wa mbehe helikopta ke Akpa Edem Usiahautịn. Ẹma ẹsịn ọkpọsọn̄ ukpeme ke kpukpru ebiet, ndien ediwak mme bodisi ẹma ẹsan̄a ẹkpeme Itie Ubọ-ofụm. Kiet ke otu mmọ ama asan̄a ekpere Kathleen onyụn̄ obụp enye se akanamde. Kathleen ama ọbọrọ ete: “N̄kpan̄ utọn̄ n̄kop tape usem Russian. Omokụt, ami ndi kiet ke otu Mme Ntiense Jehovah, nnyụn̄ nyom ndikpep usem Russian man n̄keme ndibuana eti mbụk Obio Ubọn̄ Abasi ye mbon ẹmi ẹsemde Russian ẹmi ẹdide ẹdidụn̄ ke obio emi.”
Bodisi oro ama ọbọrọ ete ke akpatre isua 15 esie nte akwa owo ukpeme ke New York City, imọ ima idikọri ima sụn̄sụn̄ inọ Mme Ntiense Jehovah. Enye ọkọdọhọ ete: “Ami n̄kụt Mme Ntiense Jehovah nte ido ukpono emi enyenede ndutịm emi mme andibuana ke enye ẹnyenede udọn̄ esịt akpanikọ ndin̄wam mbon en̄wen ke n̄kann̄kụk.”
Ẹdiọn̄ọ Mme Ntiense Jehovah ke ofụri ererimbot kaban̄a utom ukwọrọikọ eke enyịnusụn̄ sịm enyịnusụn̄ emi mmọ ẹnamde. (Utom 20:20) Ke adan̄aemi mmọ ẹnyande ubọk ẹwụt Obio Ubọn̄ Abasi nte n̄kukụre usọbọ kaban̄a mme mfịna oro ẹnọmọde ubonowo, mmọ n̄ko ẹn̄wam mme owo ndifori uduot uwem mmọ ebe ke ndisịn udọn̄ nnọ mmọ ẹda mme edumbet Bible ẹsịn ke edinam ke uwem mmọ eke usen ke usen. Ke uwụtn̄kpọ, Mme Ntiense ẹsisịn udọn̄ ẹnọ mme ete ye eka ndinam idaha oro ọfọnde ndikpep n̄wed odu ke ufọk. Mmọ ẹnọ mme owo item ndinam akpanikọ nnyụn̄ nnịm ibet, ẹsịnde udọn̄ ẹnọ mmọ ndinyene mme usọ ye edu oro eteutom edibatde ke ọsọn̄urua.
Ih, Mme Ntiense Jehovah ẹnen̄ede ẹnyene udọn̄ ke ndin̄wam mme owo ke n̄kann̄kụk ẹfori uwem mmọ. Ẹnọ fi ufiop ufiop ikot ndinam n̄kpọ mban̄a enọ etienede mi.